Mescos cu InselAir Aruba, InselAir International B.V. (Corsou) tambe a haya suspension di pago

InselAir International B.V. (Corsou) mescos cu InselAir Aruba a haya surseance van betaling (suspension di pago), evitando asina p’e compania bay bancarota.

E decision aki Huez di Corte di Husticia a diamars ultimo na Corsou, cumpiendo asina cu peticion di e compania, sperando cu e compania ehecuta su plan di rescate y sali for di su problemanan financiero.

 

Varios t’e companianan di Corsou y Aruba cu a pidi bancarota di InselAir. InselAir Corsou a haya te dia 9 di juni pa regla su asuntonan. Riba e dia ey, lo mester tuma un decision of lo dicidi di prolonga e surseannce van betaling.

 

RETIRO MESTER CAY

Den oranan di merdia, gerencia di InselAir a organisa un conferencia di prensa, unda a wordo reitera cu como 250 persona mester haya nan retiro.

Tumando na cuenta cu InselAir no tin ningun avion pa haci ningun C-Check, lo nifica cu tampoco InselAir mester di su personal di mantenimento y cu gran parti di dicho departamento por wordo manda cas.

 

Na Aruba, InselAir tin unicamente 93 empleado, kendenan ta cu ayera no por a cobra ainda nan salario di februari.

Stephan van Spaandonk ta na Aruba, pa wak con por haya placa pa cumpli cu pago di dicho salario, pero parce dificil.

Esaki por tin consecuencia cu no ta keda Corte nada otro di haci di declara InselAir Aruba bancarota dia 7 di juni awor, cu t’e fecha cu Corte a stipula pa InselAir regla su asuntonan financiero.

 

Tur cos ta mustra cu lo elimina e compania InselAir Aruba y unico cos lo keda, ta un oficina di InselAir, cu lo atende asuntonan coriente pa InselAir International.

 

NINGUN RAPORT

Juni Sluis COO di InselAir a bisa di no sa di ningun raport di Inspectornan di Aviacion Civil di Hulanda, kendenan mester a bin haci nan evaluacion y duna nan recomendacionnan final.

Y cu te hasta tabatin entrada hudicial na algun cas di ehecutivonan di InselAir, tampoco Juni Sluis por a confirma.

 

AVIONNAN MD

Pa loke t’e avionnan MD, cu ta registra na Aruba, e situacion ta status quo. Ya e situacion ta dos luna caba, pero tur e avionnan aki ta staciona na Corsou.

Segun Juni Sluis, nan ta sigui cu nan plannan di deregistra un di e avionnan MD y un Fokker 70.

InselAir ta sigui bula entre e islanan ABC y pa St. Maarten, sperando cu e plan di rescate keda ehecuta pa despues normalisa e situacion di e compania.

 

 

Top