Mester tin claridad pakico un paciente ta bay dos biaha Hospital y ta mand’e cas pa bay muri

Durante conmemoracion di Dia Nacional di Aruba, tata di Parlamentario mr. Xiomara Ruiz Maduro a bira malo diabierne anochi na Cede di MEP. A transporte pa hospital den careda di 12.or mei anochi cu ambulance.
Eerste Hulp, aparentemente despues di a samin’e, a dicidi di mande cas bandi 3or di marduga. Na Hospital (?) esnan den Sala di Emergencia a constata ningun motibo pa interne.

Pero algun ora despues, band’i 6’or mainta, Tommy Maduro a bira mas malo na cas y a bolbe hibe Hospital pasobra su situacion a empeora y bira mas critic. Di acuerdo cu nos informacion a bolbe mand’e cas, pasobra a bolbe constata cu no tin nada grave.
Pero den oranan di merdia, Tommy Maduro a bin fayece.

Un situacion inaceptabel, cu na Sala di Emergencia, aparentemente no tin un dokter specialist, manera regla ta bisa, pa sikiera duna un diagnotico medico. No ta pornada un paciente ta bay Hospital dos biaha, anto pa keda bisa cu e no tin nada.
Si e no tin nada, anto di kico el a muri anto?
Nos sa cu di banda di Hospital, nan lo no duna ningun informacion di un paciente, pero Minister di Salud, den e caso aki dr. Alex Schwengle mester bin dilanti y bisa dicon e trato aki te cu el a conduci na morto di un ciudadano.

E no ta bay pasobra ta tata di un Parlamentario, pero e ta un ser humano, mescos cu nos tur, y como tal pueblo ta demanda claridad. No ta prome biaha cu Eerste Hulp ta manda paciente cas, dunando un parcetemol y bay sosega. Awor cu nos ta ampliando y construyendo un hospital nobo, pueblo merece un trato di 5 strea tambe.
Nos no por para keto di pidi Eerste Hulp pa ban ta mas serio cu cada caso y cada bida. No ta supose di manda un persona cas pa bay bira mas malo. E situacionnan aki ta inaceptabel y no por sigui asina.

Na famia di Tommy, sigur tambe na su yiu muher, Xiomara Ruiz Maduro ta bay nos mas sincero condolencia.

Leave a Reply

Top