MFA Noord ta brinda Chikitin Bin Bin espacio pa expone nan obra di Carnaval

 

Apesar cu e temporada di Carnaval a pasa, publico cu ta bishita MFA Noord por admira ainda e bunita trabou cu lider y mayornan di scol Chikitin Bin Bin a traha e aña aki.

Esaki ta un idea cu a bin di parti di directiva di MFA Noord pa duna realce n’e contribucion cu e bario ta haci na nos cultura.

E roadpiece bunita ta den exhibicion te cu fin di maart pa tur hende cu kier wak e di cerca, saca potret y aprecia tur detaye, esfuerzo, tempo y placa cu a hinca den dje.

 

Chikitin Bin Bin cu ta un scol di hunga pa mucha di 2 pa 4 aña, tin nada menos cu 42 aña participando den Carnaval di Aruba, specificamente den parada infantil na Noord, San Nicolas y Oranjestad.

Un comision consistiendo di docente y mayornan ta traha hopi duro pa semper bin cu un grupo di mucha riba caminda cu roadpiece p’e Reinanan y mas.

 

Directiva di MFA Noord ta interesa den por fia of haya mas piesa di Carnaval pa por expone nan.

Personanan dispuesto por tuma contacto na mfanoordaruba@gmail.com. E esfuerso aki ta forma parti di e vision di MFA pa crea lazonan estrecho cu e comunidad den cual nan ta ubica, promove e cultural local y brinda espacio pa artistanan Arubiano por exhibi nan obranan.

 

“E reaccion di parti di publico ta hopi positivo,” asina Chris Figaroa, Assistant Manager a bisa. Por ehempel, e exposicion di Danilo Geerman, cu ainda ta andando, a produci benta p’e artista. Di parti di e publico tambe tin comentarionan bon cu ta papia di un ambiente agradabel caminda por conoce algo diferente di nos cultural.

Coordinador Eta Ignacio di Chikitin Bin Bin a duna di conoce cu ora MFA a acerca nan cu e idea, nan a guste hopi y acepta di biaha.

 

“Nos ta haya un great idea paso bo ta dedica asina tanto tempo pa traha un roadpiece, perde anochinan di soño, pero despues di paradanan di mucha bo mester djis bay warde.”

Ignacio ta invita un y tur pa bishita MFA Noord pa admira nan creacion, teniendo si cuidou di no dañe pasobra nan recursonan ta limita y semper ta recicla e material cu nan ta usa den proximo añanan.

 

 

 

Top