Michael Lampe: Ta great cu Gobierno ta explora posibilidad di un efecto mas positivo den comunidad di Oranjestad

Entre esnan cu a asisti n’e presentacion di Goldman Properties algun dia atras organisa pa Oficina di Inovacion, ta Michael Lampe.

E conocido artista musical di Datapanik, awendia tambe ta un miembro di e comunidad downtown Oranjestad.

Na edificio di ex El Mercado na Steenweg, Lampe a cuminsa cu un centro creativo; algo cu ta cuadra completamente cu e concepto di haci Oranjestad un experiencia mas amplio cu djis haci compras.

 

“Mi ta kere cu ta hopi importante, no solamente pa Aruba, pa yuda crea y forma nos identidad mas ainda p’e sector turistico, pero tambe p’e progreso di nos hendenan mes cu atrabes di creatividad y arte por yuda hopi,” Michael Lampe a comenta.

Como productor y mente creativo Arubiano, Lampe ta sostene e iniciativa di Gobierno pa busca conseho for di esnan cu ya tin e experiencia den con pa desaroya un bario cu hopi reto, den un destinacion cu atractivo internacional.

Goldman Properties t’esnan responsabel p’e revitalisacion di Soho na New York, como tambe mas recientemente Wynwood na Miami.

 

Según Michael Lampe: “Mi ta kere cu den e siguiente lunanan y den siguiente añanan, manera nos por wak loke ta pasando globalmente, comerciantenan ta hopi interesa no djis pa inverti den algo cu ta crea hopi cen bek, pero na mesun momento bo ta crea cen cu ta hinca den bo sociedad y ta yuda bo comunidad.”

E aspecto di empresarionan social ta loke BEAM kier ta un ehempel di dje.

BEAM t’e centro creativo cu Michael Lampe ta dirigi. Hunto cu otro instancia ta yuda individuonan pa bira profesional y expresa nan mes ofreciendo un lugar caminda nan por topa cu creatividad.

Algo asina por tin hopi mas pa nos comerciantenan cu djis inverti den algo; e ta duna nan e satisfaccion y ta conecta cu posibilidad cu nan mes no a pensa cu tabatin.

 

“E ta un centro creativo na unda cu nos ta stimula tur nos creatividad riba e isla cu diferente idea, workshop, e ta un galeria, e ta un centro y espacio y edificio multifuncional cu nos ta stimulando nos sector creativo,” Lampe a splica.

Nan tin les di canto pa mucha, pero tambe grupo di IPA cu kier hiba creatividad mas cerca di bario.

Asina ta yuda Aruba shape su identidad y, claro, tambe e espacio Oranjestad ta haya su forsa atrabes di iniciativanan asina.

Michael Lampe ta contento di wak cu, contrario n’e caso di Soho y Wynwood, aki na Oranjestad Gobierno ta dispuesto pa motiva y sostene e esfuersonan pa revitalisacion.

Esey ta haci cu ta hopi mas facil pa drenta y crea un efecto positivo den caya y barionan.

 

“Ta hopi interesante pa wak cu Gobierno ta pusha den e ramo ey tambe y ta explorando e posibilidadnan pa wak con esaki por tin un efecto positivo pa cu e comunidad rond di Oranjestad y mi ta kere esey ta algo great,” Lampe a bisa.

E ta añadi cu ta semper bon ora nos ta positivo pa wak unda nos por crece y esey ta intencion cu tin.

“BEAM ta un iniciativa independiente, pero ta duna hopi apoyo ora cu ta ripara cu nos ta alinea riba unda nos kier bay y nos ta riba mesun liña unda cu por yuda y traha hunto pa na final di dia yuda Aruba crece y pone riba mapa.”

Top