Michella Steenvoorde-Lacle di Partido POR: “Start-up Homes” pa e hoben y reinforsa nos mercado di trabou a base di un un plan strategico ta un prioridad

Pa prepara nos hendenan pa miho oportunidadnan di trabao cu un futuro digitalisa

 

“Desde mi añanan di estudio y combersando cu masha hopi studiantenan mescos cumi cu ta studia den exterior y ta mira nos isla di un otro angulo. Como estudiante den exterior, e problematica di mas grandi tabata y ta con nos ta reintroduci nos mes den e campo di trabou y logra asina cumpli cu nos soñonan.

Parti di e soño ta pa ta independiente y ta poseedor di nos propio cas, nos propio hogar, mientras cu nos tur ta cana cu un debe gigantesco di studio cu no ta duna nos e forsa pa emprende un negoshi y ta desminui e forsa di compra of inversion”, segun Michella Steenvoorde-Lacle.

 

“Con pa cuminsa na Aruba, si nos ta custumbra na algo sumamente diferente. E promesa di tin bo mes un hogar mester keda vigente y ningun hende por keda desampara. Den forma imparcial, cada hoben adulto tin e derecho di forma su famia y su hogar.”

“P’esey”, segun Steenvoorde-Lacle, “ta importante pa inicia proyectonan di hogarnan “Start-up” pa nos hobennan adulto en busca di nan propio hogar. Procesonan husto pa por yega na un vivienda sostenibel y digno sigur POR!”

 

“Progreso pa un y tur cu kier traha, cu kier progresa y ta sinti su mes pega pero kier un solucion, mester POR! Un plan pragmatico a ser diseña pa keda ehecuta y asina garantisa cu nos hobennan ta bolbe nos isla y ta desminui e “Braindrain” cu ta azota nos isla.

Aruba, ta un isla bendiciona y riba un planeta di desaroyonan rapido y avansa.

Steenvoorde-Lacle ta bisa cu “e fenomeno di digitalisacion y robotisacion, mi persona hunto cu Partido POR, ta para pa un maneho di enseñansa di calidad pa adultonan cu ta inclui recapacitacion pa esnan cu mester di entrenamento y calificacionnan necesario.

Miho oportunidad pa haya un miho trabao y oportunidadnan cu por inspira nos hendenan pa transcende tur limitacionnan economico sigur POR!”

 

“Pa loke ta nos hobennan cu pa un of otro motibo ta cay den un abismo y ta busca e solucion, tambe ta premira e solucion. Tur ser humano tin e derecho di rehabilita y haya e oportunidad di bay bek rib’e bon caminda. Creando un vang net pa personanan cu a bay den mal caminda y ofrecenan e oportunidad di rehabilitacion pa medio di enseñansa, nos lo trata e problemanan di criminalidad y adiccion na su raiz.”

Steenvoorde-Lacle ta bisa cu “dignidad y humanidad sigur lo ta un di e prioridadnan di mi persona y e plataforma POR!”

 

“Mi ta boga pa un enfoke fuerte riba desaroyo tecnologico den enseñansa cu un mira pa un futuro automatisa y digitalisa, un futuro na unda e talento y capacidad di nos hendenan mester wordo utilisa den formanan inovativo.

Segun Steenvoorde-Lacle, “Cu programanan di conscientisacion continuo di nos custumbernan y herencianan cultural, lo sirbi como extension pa inclui nan den e programa di integracion digno di Aruba su custumbernan y historia. Un Aruba uni rib’e mes un principionan y identidad sigur POR!”

 

“Cu bo aporte, bo sosten, mi lo por logra realisa e plannan cu ya mi a presenta na varios instancia, na hobennan cu ta hunto cumi pa nan ehecucion, ya como hobennan cu e amor pa haci di nos isla algo miho, nos tur lo POR”, Steenvoorde-Lacle ta termina.

Top