Michella Steenvoorde Lacle, Partido POR: “Bo opinion ta lo mas principal cu bo ta laga atras”

No ta balornan sino e bondad di bo hechonan cu lo conta na final

 

Awe ta falta exactamente 100 dia pa cada persona haya e oportunidad pa eherce nan derecho fundamental cu ta vota p’e programa, plataforma, partido of persona cu mas nan ta identifica nan mes cune. Cada persona lo mira den profundo di nan ser si ta sigui cu e mesun programa existente of ta duna oportunidad na un otro plataforma pa trece cambionan.

Un di e puntonan cu ta domina un decision sigur ta expectativa y obligacion. E otro ta pobreza y e falta di premira e pobreza interno pa tuma e decision necesario.

 

Pobreza ta ensera miedo, stress y depresion y ta aki ta unda e punto debil ta sinta na momento di vota. E miedo di represaya, e miedo di keda sin nada, e miedo di keda atras ta loke ta pusha un persona pa no vota segun su curazon, pero lo vota pa miedo di faya. Cada persona mester por comprende cu fayonan den bida tin bez ta inevitable. Pero ta keda na cada un di nos pa vota cu corahe y sin reservas, segun sra. Michella Steenvoorde Lacle, candidate di POR.

 

Masha poco ta tuma e corahe y halsa nan voz. Otronan cu si tin e corahe ta halsa nan voz no solamente pa nan mes, pero pa tur cu no por of no ta tribi pa haci tal.

E corahe pa re-construi bo bida, pa anadi seguridad na bo mañan y e mañan di bo sernan queri, bo yiunan, bo comunidad ta den e voto cu lo wordo duna hustamente y cu balor.

Un di e puntonan cu sigur lo mester tene cuenta cune y cu ta un parti interesante ta nos grandinan cu ta wordo poni un banda y na unda e productividad di e grupo aki ta bira cada dia menos.

 

Segun sra. Michella Steenvoorde Lacle, ta comosifuera ora un persona cumpli 60 e no tin cupo mas den un sociedad. Hopi t’e partidonan cu ta basa nan mes riba e hobennan lubidando cu esnan di edad ta un mayoria hopi grandi y cu nan bida tin nificacion y balor. Esaki merece un cambio.

Aruba tin un problema social hopi grandi, y ta keda na cada persona pa ta parti di construccion di e nos nacion, di nos hobenan.

Ta dor di yuda otronan nos ta yuda nos mes. E paradigmo di servicio ta na momento cu bo ta haci di bo trabao, bo ayudo, un regalo, un regalo cu bo ta laga atras.

 

Tin masha hopi grandi cu ta na cas cu tin e habilidad di atrabez di consultanan yuda e hobennan pa sa mas di nos custumbernan, di nos cultura.

Cu ta dispuesto pa comparti den abundancia cu otronan. E programa di Traimerdia, incopora den scolnan cu ta bay mas largo cu 1.15 lo por wordo incorpora dor di grandinan tambe cu nan cuentanan, nan sabiduria encuanto nos custumbernan. Statistica ta mustra cu un hoben ta scucha mucho mas liher for di un grandi cu for di un hoben.

 

Y si nos ta sincero un grandi lo haci esaki cu amor ya cu pa nan grandeza ta representa servicio. E duna di nan banda y laga atras nan sentimento na momento cu nan touch e curazon di e hoben, ta di nificacion grandi. Ta p’e motibo aki cu mester introduci procedura y facilidadnan pa mehora e guia y enseñansa na alumnonan cu problema di comportacion (por ehempel mediante “rebound school” y “summer school”) y inclui nos grandinan tambe di ayudo. Aki mester di e cambio.

 

E perdida di confiansa di nos grandinan, no mester ta un obstaculo, e perdida di contacto cu e comunidad aki cu consecuencia cu comunidad ta sinti su mes neglisha NO mester t’e motibo pa keda sin vota.

Al contrario sin pensa dos biaha nos mester ta consciente cu e voto e biaha aki mas cu nunca t’e manera pa laga atras bo legacia.

Bo regalo cu bo ta laga atras na momento cu bo decision y bo corahe a cambia e destino di bo nacion.

Sea honesto cu bo mes y haci e decision cu lo cambia bo bida y esun di bo yiunan. Y laga e scuridad cu ta eherce actualmente riba nos Aruba bira luz y no polariza pa interes personal. 100 Dia falta p’e dia di votacion y mas cu nunca Aruba merece un resultado mihor, sra. Michella Steenvoorde Lacle a conclui su mensahe.

Leave a Reply

Top