Michelle Steenvoorde Lacle (POR): Calidad den ensenansa mester ta di un nivel superior ‘Medezeggenschapsraad’ mester bira un hecho

Na momento di ta referi na un empresa exitoso, empresarionan semper por hustifica e regla primario cu ta sinta tras di e exito aki. Empleadonan!

Trahadornan den nan funcion, cu no solamente ta sinti nan como un parti importante di e empresa, pero alabez ta eherce nan trabou diario cu competencia y eficiencia.

Den organisacionnan “non profit” manera scolnan, esaki no ta nada diferente. Maestronan den e caso aki lo kier ta sinti nan mes aprecia y scucha. Na palabra, Michelle Steenvoorde Lacle di partido POR.

 

Aruba ta den aña 2017 y te ainda scolnan maetronan y/o mayornan no ta conta cu un “Medezeggenschapsraad” den decisionnan cu ta wordo tuma den inovacion y accion den enseñansa. Masha hopi t’e decisionnan cu ta wordo tuma pa cu cambionan den enseñansa sin e intento pa inclui e opinion di docente y mayornan.

T’asina cu decisionnan tocante e calidad di enseñansa sa wordo tuma dor di expertonan cu nunca a traha o biba di serca di loke en realidad ta pasa n’e scolnan.

 

35 ORA DILANTI DI KLAS

Tumando encuenta cu scolnan Europeo, un maestro cu un ‘volledige betrekking’ den enseñansa secundario, ta para un maximo di 20 ora (di 50min) pa siman dilanti di klas.

A base di raport di OESO (Organisatie voor Economische Samenwerking en Ontwikkeling), Hulanda a vota na 2014 den Tweede Mamer pa introduci e ley cu un maestro mag di para 20 ora maximaal dilanti di klas.

Lo demas ta wordo reparti den ‘taakuren’. E argumento di OESO pa cu esaki ta cu asina e maestro ta cumpli cu su tarea optimalmente.

No obstante na Aruba, maetronan ta cumpli cu 34 o 35 ora (di 45 min) dilanti klas, y cu klasnan mucho mas amplio di diferente grupo etnico y nivel di habilidad, segun Michelle Steenvoorde Lacle.

Loke ta trese cune facilmente ta ‘burn outs’ di maestro y desencumplimento na momento cu e mester alcansa ‘targets’ y ‘deadlines’.

 

Un maestro cu ta den e mesun funcion tur dia ta core peliger di keda pega den e mesun tipo di asunto, y ta importante p’e tin e ‘input’ di homologonan p’e tende otro idea, haya un bista fresco riba cierto topico.

Na mesun momento t’asina cu un maestro tambe mester wordo controla riba e calidad y contenido di su lesnan.

 

INSPECCION

Inspeccion t’e organo di control y di conseho di Ministro di Enseñansa. Inspeccion tin como tarea principal: Stimula scolnan pa traha na cuido di calidad; raporta y duna conseho tocante e desaroyonan señala; evalua calidad di enseñansa; vigila cumplimento di e reglanan legal cu ta regarda enseñansa.

 

Actualmente tin un solo persona cu ta funciona como ‘Inspecteur’ pa controla tur 83 scol secundario. Esaki ta un tarea imposibel; dificil pa cumpli y bishita tur klas como minimo 3 biaha pa aña.

Un tarea cu lo mester keda p’e nombra por t’e funcion di un Inspector interino en conhunto cu un Director.

Sinembargo y ironicamente e linea di autoridad no ta regla pa cu su debido ehecucion. Pa ley ningun, adjunct Inspecteur den funcion, ni Director tin e autoridad pa actua, ya cu tecnicamente t’e Minister en funcion t’e unico cu ta autorisa pa efectua cambionan. Esaki kiermen cu actualmente e control riba enseñansa ta na encargo di e Minister di Enseñansa.

 

DIGITALISACION

Un otro factor importante den calidad di enseñansa t’e hecho cu studiantenan ta wordo stimula ainda dor di calidad di enseñansa di 20 aña pasa.

Awendia alumnonan ta desea di traha cu material inovativo y actualisa. Material digital.

No efectuando cambio n’e contenido, pero si n’e tipo di material pa traha cu ta conoci p’e studiantenan

Aruba a evoluciona den masha hopi area y sentido y ta casi inaceptabel pa un isla asina moderno ainda ta recuri na borchi y krijt.

 

Un sondeo haci a conclui cu pa digitalisa un scol di mas o menos 250 alumno, lo ta rekeri un inversion di 100 mil pa 200 mil florin. Inversionan chikito na nivel di gastonan haci pa organisa conferencianan sin ningun clase di rendimento.

Por a tuma nota di desaroyo y inversionnan cu ta tumando lugar den enseñansa a hiba un aumento di 5.7 miyon florin.

Esaki lo mester ensera mas inversion den personal, subsidio, seguridad. No obstante e digitalisacion y modernisacion un biaha mas ta wordo neglisha, segun Michelle Steenvoorde Lacle.

 

Pues asina tin hopi punto cu por wordo cambia pa mehora e calidad di nos enseñansa. Pa complementa cambionan den desaroyo y ofrece un mira mas amplio na loke ta enseñansa, e plataforma E Forsa Nobo di partido POR kier a invita tur gremio, muy en particular maestro y mayornan pa forma parti n’e “ denk team” y hunto yega na establece e prioridad pa nos generacion y nos nacion cu ta enseñansa.

 

Top