Mientras na Bonaire tin masha desaroyo den aviacion Na Aruba un grupo di inversionista a ser nenga pa bin cu un MRO

Ayera nos por a tuma nota di un publicacion den EXTRA, seccion Bonaire, bao di e titulo: “Yen di compania y yen di plan. Desaroyonan interesante den aviacion riba rutanan ABC”. E situacion ta birando mas interesante, ora cu no tin confianza mas den InselAir y pesey tin compania cu kier bin pa sirbi e ruta ABC, cuminsando cu e companianan di aviacion di Bonaire mes, manera Divi-Divi Airlines, cu a anuncia di tin na caminda dos Twin Otter, mientras cu EZ Air a dicidi di reanuda su servicio di Bonaire pa Corsou, semper y cuando di kier bula pa Aruba tambe, usando tambe e avionnan tipo Twin Otter.

 

Esaki porcierto a keda participa pa Diputado Clark Abraham, pero kende a anuncia tambe cu tin un otro compania nobo cu ainda prome cu fin di aña benidero lo cuminsa bula. Nan lo usa Bonaire como nan base y dicho compania tambe lo bin cu Twin Otter pa sirbi Corsou y Aruba. Como cu e plannan no ta rond ainda, Diputado Abraham no kier menciona nomber, y a limita na bisa cu ta un iniciativa priva, sin participacion di Gobierno.

 

Pero tambe tin un otro grupo Europeo interesa pa bin cu un avion di 34 asiento pa bula entre e islanan ABC. Aki tampoco Diputado Abraham no kier menciona nomber, pero aki na Aruba nos tin entendi cu ta un compania Belgo. Kier men tin un interes grandi.

 

ARUBA

Na Aruba tambe tin un grupo local, sosteni pa un grupo di afo, cu kier bin bula e islanan ABC, pero cu avionnan Beachcraft di 19 pasahero. Nan ta hopi avansa cu nan documentacion pa por haya nan AOC.

E mesun grupo aki kier bin cu un proyecto di MRO (Mantainance-Repair-Overhaul), cu si nan haya permiso, lo crea sigur 600 cupo di trabao.

 

Extraoficialmente nos tin entendi cu autoridadnan di Aeropuerto a nenga nan e proyecto aki, pasobra na Aeropuerto di Aruba no tin espacio mas. E MRO, ta pa mantene, drecha y overhaul avionnan grandi, manera e Airbus 320, 330 etc. Nan tin sosten caba di e.o. compania di aviacion grandi cu ta bulando cu equiponan Airbus, manera Avianca y TamLan.

E MRO mas serca, ta keda na Rio Negro, Colombia, cu ta dunando 1000 pa 1500 hende trabao, pero no por atende tur e avionnan Airbus cu kier servicio y lo tin Aruba como un posibilidad.

 

Manera menciona, Aeropuerto su gerencia a laga sa cu nan no tin espacio pa tal proyecto, pasobra e lease di FOL su tereno a caba di ser extendi, y si kier bay mas pariba, lo mester basha e Centro di Bario Simeon Antonio y cumpra algun cas den e becindario. Esey Gobierno no kier.

Y como tal e grupo aki lo a duna di conoce cu nan lo bay cu e proyecto aki pa Bonaire, unda nan si ta masha interesa.

 

Top