Mientrastanto un persona mas a keda deteni sospecha di comete soborno den caso di Minister Paul Croes

 

Ultimo dianan den varios medio di comunicacion, a start un confusion tocante e hecho cu supuestamente lo a debolbe cosnan cu lo a wordo tuma den beslag di sospechoso Minister drs.Paul Croes. Ministerio Publico ta haya hopi importante pa aclarea e confusion aki.

 

Pero prome cu esaki, Ministerio Publico a confirma cu tin un detencion mas cu a cay, den persona di e Chines, F.Y. Cheng, propietario di Cheng’s Supermarket na Bubali. E ta sospechoso cu e tambe lo a comete soborno, ofrece placa pa haya permiso y el a keda deteni pa mas investigacion. Te awor tin un total di 4 persona deteni den e caso IBIS, manera e ta ser califica.

 

Pa loke t’e pertenencianan cu lo a ser duna bek na Minister drs. Paul Croes, t’asina cu durante e investigacion IBIS, Huez-Comisario a tuma cosnan den beslag na Bestuurskantoor, bao di cual cosnan for di oficina di sospechoso Paul Croes.

Recientemente algun di e cosnan cu a wordo tuma den beslag na Bestuurskantoor, a wordo debolbi na Bestuurskantoor.

 

Bao di e cosnan aki tin algun USB-stick, computer, laptopnan y un cel Blackberry. Si algun di cosnan aki a wordo duna na sospechoso Paul Croes dor di Bestuurskantoor of den nomber di Bestuurskantoor, no ta conoci na Ministerio Publico, ni e ta responsabilidad di Ministerio Publico tampoco.

E cosnan cu Huez-Comisario a tuma den beslag den e investigacion IBIS den cas di sospechoso drs. Paul Croes, no a wordo duna bek na Paul Croes. E cosnan aki ta sigui den beslag.

 

Cosnan cu wordo tuma den beslag na beneficio di waarheidsvinding den un investigacion, ta wordo debolbi asina cu e investigacion riba e cosnan ey ta cla.

Cu cosnan wordo debolbi na un sospechoso durante e investigacion penal no ta bisa nada tocante e sospecho of e resultadonan di e caso penal. E ta nifica unicamente cu e investigacion riba e cosnan specifico ey ta cla. Te aki e aclaracion di parti di Ministerio Publico.

 

 

 

 

 

Leave a Reply

Top