Mike Eman, e visionario y arkitecto di renobacion di Aruba

Mas y mas e vision di Prome Minister Eman ta birando visibel den tur skina di Aruba, principalmente den Centro di Ciudad. Un vision cu ta encera varios edificio renoba, restaura, remodela y tambe construccion di parke y otro centronan di encuentro.

Na momento cu Gabinete Mike Eman a sinta na 2009, ya e plannan pa entre otro e Centro Historico tabata cla, ya for di oposicion a pone atencion riba edificionan cu no tabata mag di a bay perdi. E plannan tabatey, mester a pone nan den ehecucion y esey a sosode di inmediato. A reconstrui Bestuurskantoor y e Gobierno nobo cu a caba di sinta por a drenta eyden pa cuminsa traha. Un edificio cu tabata na punto di wordo bendi door di e Gobiertno prome cu Gabinete Mike Eman.

 

A sigui cu restauracion di e centro historico. Varios edificio tabata den estado di deterioro, entre nan watertoren, edificio di RekenKamer, cas di Gobernador, censo y hopi mas.

A construi Cocolishi dunando realce na e centro di gobernacion y a renoba e edificio bieu di Havenkantoor. E cambio ta visibel y tur hende ta admiti esaki. Vision di Prome Minister ta haya su perfil.

Diabierna awor, e Binnenhof ‘Plaza Padu’ ta keda inaugura. Plaza Padu a wordo traha den estilo di un ‘Binnenhof’, p’asina Aruba henter por gosa di dj’e. Plaza Padu ta parti di e vision di e actual Gobierno y sin duda Prome Minister Eman pa loke ta renobacion di Centro di Ciudad. E vision aki ta birando un realidad den cada faceta.

 

E persona na kende e Plaza ta dedica ta Juan Chabaya ‘Padu’ Lampe. Un shon di hende, stima y aprecia pa tur cu conoce. Un persona sumamente talentoso, creativo y inspirativo. Padu ta un di e compositornan di nos himno nacional “Aruba Dushi Tera’.

Banda di ta un musico cu a produci cancionnan inolvidabel manera e di e dos himno di Aruba ‘Abo So’, Padu ta tambe un pintor y un autor di bukinan metafisico.

Pero mas ainda Padu ta un luchado di prome ora di nos Status Aparte. E lucha di e humilde pueblo Arubiano a inicio den siglo pasa. Un lucha sagrado, un anhelo grandi, un deseo cu despues di hopi contratiempo a keda realisa na 1986.

Mescos ta e amor incondicional cu Aruba henter tin pa Padu, e icono Arubiano, nos tata di cultura. Na momento di ceremonia di groundbreaking di Plaza Padu Prome Minister Eman a elogia Padu cu e siguiente palabranan.

“Ta poco personalidad nos tin na Aruba cu a duna un contribucion na e aspecto politico y e desaroyo constitucional y a duna un contribucion balioso pa eternidad den crea e vinculonan entre nos como ciudadanonan cu e suelonan stima di nos dushi tera Aruba”.

 

Prome Minister Mike Eman ta berdaderamente orguyoso y contento cu su vision y di su gabinete ta birando realidad. Na momento cu algun aña pasa miembronan di Gabinete Mike Eman den oposicion e tempo ey, a para duro pa no bende Bestuurskantoor, tabata pa e vision con ta mira e rol di Bestuurskantoor. Un centro di gobernacion cu ampliacion y su propio plaza, estilo Binnenhof como parti di renobacion di Centro di Ciudad.

Leave a Reply

Top