Minister Angel Bermudez: “Nos a fortifica e supervision di Banco Central, entre otro, riba fenomeno di ‘raspa tarjeta”

Siman pasa Parlamento a aproba unanimamente e ley cu ta fortificacion di e supervision di Banco Central riba instituto of companianan cu ta transferi placa pa exterior y cu ta cambia placa di valuta.

“Nos a amplia e definicionan den e ley p’asina Banco Central tin un mihor supervision riba e desaroyonan aki”, asina Minister di Finanza, Angel Bermudez a indica.

 

Segun e mandatario, e desaroyo cu ta tuma lugar na Aruba unda cu turista of personanan no por haya valuta of dolars den nan mesun pais y consecuentemente nan ta ‘swipe’ aki na Aruba pa nan por conta cu placa of dolars cash, ta locual a duna inicio n’e proposicion pa fortifica e supervision di Banco Central.

 

“Esaki basicamente ta un actividad bancario, pero nos a ripara cu no ta na institutonan bancario nan tabata haci esaki si no na diferente negoshi den nos comercio”, asina Minister Bermudez a expresa.

Minister Angel Bermudez a sigui splica cu esaki ta trata di un salida di dolars, pues Banco Central como instituto encarga pa supervisa nos moneda y nos divisa mester tin e hermentnan necesario pa supervisa e desaroyonan aki manera debe ser.

 

“Pa bo tin un registracion riba esaki, nos a bin cu e areglo aki cu ta duna nan mas posibilidad pa registra y supervisa un desaroyo asina”, e mandatario a bisa.

Na mes momento Minister Bermudez ta aclaria cu e companianan cu ta realisa e actividadnan aki como parti di nan negoshi mester ta registra na Banco Central y nan tin 6 luna pa haya e permiso indica pa realisa e actividadnan aki.

Top