Minister Angel Bermudez ta felicita PFTSA cu su 25 aña

E siman aki ‘Pension Fund Tourism Sector Aruba’ (PFTSA) ta celebra su di 25 aña di existencia. Minister di Finanza, Angel Bermudez ta orguyoso di por a forma parti esaki y ta felicita e organisacion cu nan hubileo.

E mandatario ta splica cu e concepto pa lanta e fondo aki 25 aña pasa tabata un concepto inovativo y cu beneficio tanto p’e doñonan di trabou como tambe e empleadonan den e sector turistico.

 

“Mi a gosa e idea, mas ainda cu den e tempo ey ora cu esaki a keda proponi na mi, e tabata un concepto hopi progresivo”, Minister Bermudez ta conta.

Minister Bermudez a indica cu e semper tabatin interes p’e materia di pensioen, apesar cu en realidad e ta un materia hopi complica, pues na momento cu el a keda aserca pa algun pionero den e sector turistico na cuminsamento di añanan 90 pa crea e fondo aki, el a acepta pa forma parti di e plataforma aki.

 

Den su funcion actual e mandatario ta splica cu comunicacion, educacion y informacion ta factornan importante tanto di parti doñonan di trabou, como tambe Gobierno pa henter comunidad laboral por tin un plan di pensioen.

“Hopi hende no ta pensa riba pensioen te ora nan ta yegando un edad unda cu nan ta realisa cu nan ta cay bek riba un entrada chikito ora nan sali for di mercado laboral”, asina e mandatario a expresa.

 

Apesar cu 25 aña pasa e fondo aki a cuminsa na un manera hopi modesto manera cu e mandatario di finanza mes a indica, el a enfrenta desaroyonan cu desde un principio no a premira manera ‘vergrijzing’ y e crisisnan economico cu Aruba a enfrenta y awendia PFTSA ta sigui eherce un funcion importante specialmente pa tur e empleadonan den sector turistico.

 

“Na mi parecer e fondo tabatin un bon comienso sin importa cu su inicio tabata uno modesto, paso bo ta laga ambos partido custumbra cu nan ta participa y aporta na un plan cu den futuro ta beneficia tanto p’e empleado como e doñonan di trabou”, Minister Bermudez a bisa.

E mandatario di finanza ta extende un caluroso pabien na ‘Pension Fund Tourism Sector Aruba’ (PFTSA) y tur esnan cu durante asina hopi aña tambe a aporta y forma parti di e fondo aki.

 

 

Top