Minister Arends “Nos ta orguyoso cu nos a logra trece Qredits Aruba”

Na Hulanda Prome Minister Eman a firma un contract cu CEO di Qredits sr. Elwin Groenevelt. Esaki a sosode den presencia di Hans Biesheuvel di Ondernemend Nederland (ONL) y tambe Minister Plenipotenciario Juan David Yrausquin.

 

Qredits ta un fundacion non-profit cu ta facilita micro financiamento na entrepreneurs y start ups pa cuminsa nan propio negoshi. Minister Arends tabata envolvi den realisacion di e proyecto aki desde un di su prome encuentronan cu sr. Groenevelt na Den Haag unda bou guia di Prome Minister Eman y de Meza a start e iniciativa aki cu miras pa reenforsa e pilar economico nobo. Cu e ultimo firma bou e documento oficial a duna señal cu dia 4 di april Qredits oficialmente ta keda estableci na Aruba.

 

Minister Richard Arends ta satisfecho cu awor Qredits ta partner cu Aruba: “Mas di un aña caba Qredits a acerca Aruba. Nan a bay dor di henter e proceso di pidi un licencia bancario, tambe den un proceso cu banconan y porfin dia 4 di april proximo Qredits ta habri su prome oficina na Aruba cla pa atende empresarionan. Nos di Gobierno ta sumamente contento y orguyoso cu nos a logra trece un filial Qredits na Aruba. E ta amplia e spectrum di cual e sector financiero di Aruba ta consisti di dj’e.”

 

Minister Arends ta masha contento tambe cu Qredits ya cu esaki ta duna sosten na micro financiamento y cu su potencial clientenan ta bay ta empresanan chikito cu por bin na remarke pa un fiansa te cu 50 mil florin.

“Hopi biaha acceso na capital ta forma un drempel hopi halto pa negoshinan por inicia y genera actividadnan economico den cierto sectornan cu nos ta delinea”, el a indica.

Importante ta cu aunke e riesgo di e financiamentonan aki ta mas halto den termino bankero, nan tin respaldo total di Banco di Desaroyo Europeo. Di e forma aki nos ta duna sosten tambe na negoshinan chikito, mediano y na start ups.

Top