Minister Arends satisfecho cu Plan di Accion pa combati contrabanda di gasolin dunando fruto

“Cu hopi satisfacion mi a wordo notifica pa Ministerio Publico cu afpakteam, como tambe Cuerpo Policial, a logra desmantela un banda di contrabando di gasolin for di Venezuela,” minister Arends a informa. Nos por corda algun luna atras e titular di Asuntonan Economico a encabeza un grupo di enfoke unda diferente instancia a participa pa frena e contrabando di gasolin cu ta bin di Venezuela y ta wordo importa y rebendi aki na Aruba di manera ilegal. Como cu e comercialisacion clandestino ta consisti di un acumulacion di delitonan a envolvi tambe Ministerio Publico y Cuerpo Policial. Prohibicion importacion di gasolin procedente di Venezuela tabata e prome di e decisionnan concreto pa loke ta trata combatimento di e comercialisacion clandestino aki.

Esnan cu ta participa den e actividadnan ilicito aki no ta paga accijnzen, no ta cumpli cu regulacionan di DTI, no ta umpli cu leynan di vestigingsvergunning, no ta paga belasting, no ta cumpli cu e rekisitonan di brandweer.  Contrabando di gasolin no solamente ta contribui na competencia inhusto, pero e ta forma un peliger enorme pa trahadornan di waf, pa esnan cu ta riba caminda, como tambe pa e habitantenan den e area unda e actividadnan aki ta tuma lugar. “Como Minister di Asuntonan Economico mi a alerta e instancianan concerni pa hasi esaki. P’esey amplia e grupo di enfoke cu participacion di Ministerio Publico y Cuerpo Policial pa asina por entama e pasonan hudicial necesario y penalisa e delitonan cometi,” Minister Arends a splika.

“Despues di a formalisa e prohibicion di gasoline di Venezuela, Ministerio Publico tabata na turno despues y hunto cu Cuerpo Policial a tuma e accion necesario,” minister Arends a sigui bisa. “Mi kier a gradici e instancianan hudicial concerni, especialmente Ministerio Publico, afpakteam y Cuerpo Policial pa nan diligencia y determinacion den combatimento di actividanan ilicito”Minister a haci un bes mas un yamada na comunidad pa no participa den e practicanan aki. No solamente bo ta pone bo bida na peliger, pero tambe di otronan.

 

Leave a Reply

Top