Minister Arthur Dowers pasando cas pa cas: Dakota ta berde berde

“No tin un miho forma pa campaña cu bishita e votado na su cas. Ey ta scucha e berdadero preocupacionnan, ta haya critica, ta scucha sugerencianan y specialmente ta haya elogio pa tur e trabou y esfuerso cu ta hinca tur dia den e trabou aki. Pueblo ta cu nos”, asina Minister mr. drs. Arthur Dowers a duna di conoce despues di a pasa bishita algun caya den e bario di Dakota diasabra ultimo.

 

Team Dowers ta ocupa tur e dianan aki cu atende yamada di ciudadanonan pidiendo pa pega nan bandera na cas of plak sticker na nan auto, como un forma di solidaridad na e Gobierno na mando. Ta invita tur hende pa pasa Cas di Partido AVP na Dakota entre 8:00am pa 5:00pm pa inscribi Bo mes y asina join Team Dowers den e campaña aki.

 

Mr. Drs. Arthur Dowers a participa den eleccion pa prome biaha na aña 2001 y a conta cu 203 voto di confiansa. Den eleccion di aña 2005, despues di a sinta 4 aña den Parlamento, su votonan a subi te cu 858 y na aña 2009 e votonan a sigui crece te na 1281.

Mester menciona cu despues di a goberna 4 aña den e funcion di Minister di Husticia y Enseñansa, e politico a resulta un di esunnan cu mas a crece den e ultimo eleccion di aña 2013, subiendo di 1281 te cu 2079 voto individual.

 

Su seriedad y integridad sin duda lo hib’e na un resultado aun mas grandi den e eleccion aki.

E sosten di su votadonan ta grandi y cada dia mas y mas hende nobo ta yega pa uni na e famia grandi di AVP y cu sosten pa Arthur Dowers.

Top