Minister Benny Sevinger “Renobacion di Rosa College ta otro proyecto di Gabinete Mike Eman II”

Minister di Infrastructura ta contento cu su Ministerio por coopera cu esun di Enseñansa pa logra proyectonan bunita manera esun di St. Rosa College. E ta otro proyecto mas cu Gabinete Mike Eman II por bisa cu a cumpli cune, e mandatario a bisa durante un bishita n’e scol aki, situa banda di Misa di Playa.

 

Minister Benny Sevinger den su declaracion a expresa palabra di agradecimento na tanto Minister Michelle Hooyboer-Winklaar como na funcionarionan di DOW pa tur loke ta haciendo den e parti di infrastructura di enseñansa, cu ta contribui na un mihor ambiente p’e mucha- y hobennan por studia.

“E colaboracion pa renoba y drecha diferente scol ta uno hopi fructifero y tambe pa planea scolnan nobo.”

Ademas, Sevinger a enfatisa, e tipo di proyectonan aki tambe ta forma parti di e vision di 5 strea pa tur sector di Aruba.

“Awe nos por bisa cu esaki ta otro proyecto cu nos a cumpli cune.”

 

E mandatario a expresa di ta sinti un orguyo grandi ora mira con e scol monumental a keda despues di su renobacion cu a conoce expansion di algun local pa bañonan adicional (tambe pa invalide), cantine pa studiante y espacio completamente nobo pa maestronan por reuni.

“Nos no tin ningun duda cu educacion lo subi den e proximo añanan. Mayornan por ta sigur cu nan yiunan lo haya un educacion di nivel, pero tambe den un ambiente hopi sigur.”

 

Na mesun momento e mandatario a bisa cu den e temporada di vakantie aki tambe lo tin diferente scol cu nan speelplaats lo haya asfalt, cual a wordo regla dor di Ministerio di Enseñansa.

Aworaki ta studiando cual t’e contratistanan cu por haci esaki of si e lo wordo ehecuta dor di DOW mes.

“Esaki lo bira un reto grandi pasobra nos ta asfaltando hopi caminda rond, contratistanan ta riba proyectonan grandi. Pero esaki t’e temporada pa haci e trabou na scolnan.”

 

Ayera e mandatario a reuni cu InfraTeam pa wak con ta bay atende cu e trabou di basha asfalt, pero tambe e mantencionnan cu mester tuma lugar, airconan cu mester wordo cambia, coriente cu mester wordo cambia.

E prome scolnan cu lo cuminsa pa drecha nan speelplaats ta Sint. Franciscus College, Bon-Bini y Colegio Felipe B. Tromp. Pero tin varios mas cu nan ta spera di por finalisa prome cu aña escolar nobo cuminsa.

 

 

Top