Minister Croes tambe a duna honor y respet na e 2147 firmantenan riba Plaza 18 di Maart

Diahuebs ultimo, Aruba a uni riba Plaza 18 di Maart na unda cu a reconoce, honra y duna respet na e 2147 firmantenan Arubiano cu a firma e prome peticion oficial na reino pa Aruba por haya e structura estatal cu awe nos por gosa di dj’e, nos Status Aparte.

 

E peticion aki a haya reconocemento cu aceptacion dj’e Mocion di 18 di Maart 1948 pa un Status Aparte pa Aruba na Conferencia di Mesa Rondo. E peticion aki a keda entrega pa Shon A. Eman den nomber di pueblo di Aruba, na unda cu nan a mira un vision pa Aruba haya un status diferente na e constelacion existente na e momentonan ey.

Un vision cu merece su debido elogio pa cual Minister Croes conhuntamente cu Prome Minister Mike Eman y demas coleganan a rindi honor na e firmantenan y hunto cu nan famianan a cende un bela pa cada un di e 2147 firmantenan aki.

 

Minister Paul Croes a referi na e anochi aki como: “Un anochi sumamente special na unda a duna honor na nos baluartenan cual ta esnan cu a pone e fundeshi pa awe nos pais Aruba por ta na unda cu e ta.”

 

Banda di esaki, Minister Croes ta recorda nos lidernan Shon A. Eman, Henny Eman, Juancho Irausquin y Betico Croes cu a duna tur di nan parti pa a construi e fundeshi cu a hiba na desaroyonan grandi pa nos pais. Como un politico hoben Minister Croes ta contento y honra di por a comparti un anochi sumamente bunita cu famia y amistadnan di e 2147 firmantenan cu a contribui na Status Aparte di nos pais.

Top