Minister Demisionario, dr. Carlos “Alex” Schwengle – Wound Care Symposium tabata exitoso

Recientemente DR Horacio Oduber Hospital a organisa e di “4th Wound Care Symposium” Minister Demisionario, dr. Carlos “Alex” Schwengle tabata invita pa e ceremonia di apertura. Durante di su speech cu gran satisfaccion el’a dirigi su mes na e publico cu no ta desconoci p’e  ya cu mayoria di esnan presente ta nursenan cu e conoce for di hospital y e tabata hopi contento di wak e cantidad di profesionalnan di salud cu a atende e Wound Care Symposium. E experto encarga pa conta di e sistema basa riba cuido primario di herida  tabata Dr. Yuri Casseres.

 

Segun Dr. Schwengle a expresa ainda falta hopi pa haci den e area di cuido aki, pero asina mes ta haciendo lo miho cu por. Un enfoke prioritario durante e ultimo 4 añanan ta e aspecto multi disciplinario, esta e concepto completo di cuido pa pashentnan. Pero esaki no ta algo facil, pasobra trece hende hunto pa nan pensa riba e mesun nivel y pa tin e mesun agenda, no ta un tarea facil. Aki sigur un di e aspectonan cu a resalta ta e  importantcia di traha hunto.

 

Aki na Aruba tin e recursonan material, pero esakinan no ta  ilimita. Loke si tin ta recurso humano pero den e aspecto aki ainda nos falta algun cos entre otro nursenan specialisa pa haci e trabou.  Mester inverti mas den e parti aki, pero e scarsedad mundial di nurses ta influencia nos na Aruba tambe asina Minister Dr. Schwengle a expresa.

 

E cuido di herida ta importante y e mandatario a felicita hospital, pero tambe e team cu a traha hunto pa duna tur hende e miho cuido aki na Aruba. E otro islanan cu a bishita Aruba a siña algun aspecto con pa atende cuido di herida y ainda ta mehorando esaki. “Mi ta kere cu bo mester ta autocritico y purba di mehora e sistema. Mi ta kere cu nos por siña di otro isla tambe”, Minister Schwengle a duna di conoce.

 

El a gradici p’e invitacion y a expresa palabranan di pabien na e team completo di Dr. Casseres pa un simposio exitoso. “Mi ta spera cu nos lo por sigui cu e trabounan. Mi sa cu e ta hopi trabou y mi kier pa tur hende aplaudi e team di Wound Care”, asina el a termina bisando.

Leave a Reply

Top