Minister di Asuntonan Exterior Bert Koenders “Eman cu mi a traha duro pa fortifica e perfil di Reino den mundo”

Minister di Relacionnan Exterior, Bert Koenders ta na Aruba unda el a reuni cu e tres Prome Ministernan di Reino, Koeiman di Corsou, Marlin di Sint Maarten y Eman di Aruba.

Tabata un reunion cu a dura casi henter e dia unda varios topico a haya atencion y tambe unda palabracionnan a wordo haci.

Den oranan di atardi e tres Prome Ministernan y Minister Bert Koenders a tene un conferencia di prensa pa informa pueblo kico a wordo discuti.

 

Den un entrevista cu a sigui Minister Koenders a bisa cu durante e ultimo dos aña y mey e tabatin hopi encuentro cu Prome Minister Mike Eman y nan semper tabata hopi positivo. “Nos a traha hopi hunto pa fortifica e perfil di Reino den mundo.

Hunto nos a echt traha duro y estrecho den e campaña pa logra e asiento den Conseho di Seguridad di Nacionnan Uni.

Esaki tabata algo importante, no solamente pasobra ta trata di Conseho di Seguridad, pero sigur pasobra esaki ta un branding pa Aruba y e bentahanan economico p’e isla.

Hende sa awor unda Aruba ta situa y hende sa tambe cu Aruba ta wordo representa den Conseho di Seguridad di Nacionnan Uni.”

 

Koenders a bisa cu ora ta trata di e temanan importante di e tempo aki, manera energia, transicion y henter e asunto di estadonan isleño cu tin hopi problema pa haya fondo, pa haya credito, pero dor di un campaña fuerte cu e hunto cu Eman a hiba pa logra e asiento, Koenders ta convenci cu Aruba ta riba mapa mundial den forma skerpi.

“Esaki sin duda ta bon p’e bentahanan economico y politico.”

 

Koenders a enfatisa cu actualmente mundo a bira un lugar peligroso y instabil.

“Pero mi kier pone enfasis tambe cu nos, tanto Hulanda como Aruba, tin hopi oportunidad economico awor, sigur den Latino-America.

Pero, nos ta confronta tambe peligernan, manera migracion, droga y instablidad di paisnan cu ta rondona nos, na cierto haltura un pais manera Venezuela.

Bon kier tin influencia riba paisnan asina y bo kier tambe pa resto di mundo sa cu abo t’esun cu tin e influencia ey.

Esey ta nifica cu e tema ‘Paz y Seguridad’ di tur e problemanan cu tin, bo tin mas grip riba nan.  Esey ta loke nos ta bay enfoca riba dje cu nos asiento den Conseho di Seguridad.”

 

 

Bert Koenders no ta kere cu introduccion di visa lo frena e migracion for di Venezuela. E ta pensa cu tin varios otro posibilidad pa para e migracion aki.

“Tin hopi otro posibilidad pa controla ken ta drenta y sali di bo pais. E por t’e control riba bo aeropuerto, por haci uzo di un sistema di pre-clearance, tambe por haci uzo di e sistema di ESTA unda via internet e persona ta indica di kier biaha pa Aruba of Hulanda y asina por haci checknan adelanta.

Bo no mester kita ningun posibilidad. Importante t’e seguridad di nos ciudadanonan.”

Top