Minister di Deporte dr. Alex Schwengle a reuni cu St. Fundacion Lotto pa Deporte pa prepara plan di accion pa 2017

 

 

 

 

 

 

Recientemente, Hunta Directiva di St. Fundacion Lotto pa Deporte a tene un reunion cu Minister di Deporte, dr. Alex Schwengle unda a papia riba e diferente plannan cu Gobierno y St. Fundacion Lotto Pa Deporte lo tin p’e futuro di Lotto y Deporte na Aruba.

E bishita di Minister di Deporte tabata uno den e cuadro di trabou caminda a papia riba diferente topico importante relaciona cu Lotto.

Pa mas cu un aña, Lotto y Canadian Bank Note tabata negocia un cambio di e contract data for di aña 2011 y algun siman atras esaki a wordo concretisa na cual Lotto ta masha satisfecho.

 

Awor lo focus riba otro aspectonan importante, un di nan lo t’e cambio den e statuto di Lotto, pa uno mas moderno, esaki lo bay funciona den un sistema cu nan ta yama “two tier model”, dos organo, un ta Raad van Bestuur y e otro Raad van Toezicht caminda bo ta mira un mihor balance den podernan di e organo.

Banda di esaki lo focus tambe riba e “corporate governance” den e statutonan cu Minister di Deporte ta trahando riba dje.

Ta nifica cu den e organonan aki lo bay tin codico di “corporate governance” p’e sector di Deporte y Cuido, un cambio grandi y esencial.

 

Lotto riba su mes ta sostene Minister di Deporte riba cierto investigacion andando riba e parti maneho cientifico, profesional riba e tereno di deporte, incluyendo e facilidadnan.

A traha nota y vision di deporte, pero pabo tin bista y tuma bon desicion bo mester tin cifra, informacion y data nan concreto pa traha mas eficiente y eficaz.

A papia tambe riba e facilidadnan deportivo cu ta cay bou maneho diario di Stichting Fundacion Facilidadnan Deportivo (St. FFD), pa cual mayoria di e facilidadnan deportivo Lotto t’e doño huridico.

 

Mester mester cuminsa na stimula pa usa esakinan mas, bin cu un sorto di marketing den esakinan pa genera placa p’asina yuda pa un parti n’e mantencion di e facilidadnan aki, pasobra esey ta hopi costoso.

Dos projecto grandi di cual uno ya ta andando caba t’e renobacion di e stadionnan di Guillermo Trinidad na Dakota como tambe Frans Figaroa na Noord.

Na Stadion di Guillermo Trinidad lo concentra pa drecha e tribunanan, mientras na Frans Figaroa lo traha riba e dak y luznan di e stadion cu porcierto ya pa un parti ta baha caba.

Tambe lo haci cierto trabou na tereno recreativo na Parke Curazon Jaburibari.

 

Lotto a apunta sr. Flavio Faneyte, miembro di Hunta Directiva di Lotto, un persona conoci den e mundo di judo, kende lo tin e rol di coordina e trabou di e proyectonan menciona pa St. Fundacion Lotto pa Deporte esaki hunto cu St. FFD unda lo mester tene cuenta cu e.o. e planificacion y mantencion chikito, grandi y preventivo.

Tambe Lotto hunto cu Minister di Deporte kier pa mas pronto cu ta posibel un regulacion den leynan di loteria y catochi.

Den loteria mester fortifica Lotto su posicion como e Lotto Nacional di Aruba.

 

Pa banda di catochi mester bin regulacion p’asina yega na un competencia husto y sano (“fair level playing field”) riba e mercado aki.

Ambos meta ta na bienestar di deporte na Aruba logrando pa tur operador di catochi (“bankers”) duna su fair share na deporte di Aruba. E instrumento Lotto a demostra cu e ta un bon formula pa yuda deporte na Aruba.

 

Por ultimo sr. Di-Stefano Wernet RA, Presidente di Hunta Directiva, a bisa cu ta masha contento di por a haya tambe e oportunidad pa cuminsa di re-negosha e finanza di 20 miyon florin cu Lotto tin cu Caribbean Mercantile Bank NV data for di aña 2011, un contract cu Canadian Bank Note a para garantia pe.

Cu otro palabra e vision y plannan pa aña 2017 ta uno hopi grandi y ya caba a cuminsa traha riba tur esaki, na interes di deporte na Aruba.

Top