Minister di Deporte, dr. Alex Schwengle lo no sinta na mesa cu ningun hende cu ta dedica nan weganan di number ilegal na Aruba e.o. bendedornan di Catochi, y esnan cu ta bende Lotto di Florida, Mega Million, etc.

E placa cu Lotto ta genera no tur ora ta suficiente, asina sr. Di Stefano Wernet, Presidente di Fundacion Lotto pa Deporte a duna di conoce. Pesey ta bon pa wak e competidornan di Lotto kico nan mes ta haci pa deporte y/of pa pueblo di Aruba.

Pesey tin un ley di Catochi, cu ainda ta pendiente di aprobacion na Parlamento. Segun Di Stefano Wernet, e ley aki ta hopi interesa pa regula e mundo di Catochi of gaming na Aruba.

 

Esaki ta necesario pa tin transpariencia y tin integridad y sigur confiabilidad. Esaki sigur por bisa di Lotto, pero no por bisa di e otro weganan di number cu tin of ta ser bendi na Aruba.

Cu aprobacion di e ley di Catochi, e ta crea un fair playfield, pero tin cierto issuenan cu mester wordo soluciona.

Pesey Di Stefano Wernet, como Directiva di Lotto ta haci un apelacion na Parlamento pa duna Lotto e sosten p’e por sigui crece y pa sigui duna sosten na deporte.

 

Actualmente demas weganan di number cu tin sin control, nan ta fertil pa bira canalnan pa labamento di placa y hasta financiamento di terorismo, segun FATF.

 

MINISTER SCHWENGLE

Ta Parlamento tin e poder den nan man pa cambia e ley di wega di number, cu ta na Parlamento caba, di tal manera cu tur hende lo paga nan fair-share pa yuda deporte.

Si nos perde e oportunidad aki, pueblo mester puntra su mes, ta ki sorto di gobernante nos tin, segun Minister dr. Alex Schwengle.

 

Di acuerdo cu control mundial di tur wega di number, ta stipula cu tur loteria cu tin di haci cu “good cost” ta duna por lo menos 35% di nan gross revenue pa un bon causa.

Lotto mes, di e totale omzet ta un 20% ta bay pa deporte. Si esey ta haalbaar pa Lotto, e mester ta haalbaar pa Catochi tambe, segun Minister Schwengle.

Esey ta su opinion y e lo no bay deblogua tampoco pa ningun hende. Bo ta puntra bo mes, ta pa kende(nan) e Minister ta tira e palabranan aki, nos por compronde cu e ta referi na tur esnan cu ta bende Catochi independientemente.

 

Y si nan bisa cu 20% no ta haalbaar, anto momento a yega pa nan habri nan bukinan. Pa ley na Aruba, ta un solo lotto tin, pero tin hende na Aruba ta bende e.o. Lotto Florida, Mega Million, diferente otro wega, pero tur ta ilegal. Y ningun hende cu mester mantene orden y ley, no ta haciendo net nada, segun Minister Schwengle.

E bendedornan di Catochi a sinta na mesa cu Minister di Finanza, pero nan no a sinta cu Minister Schwengle, kende a laga sa cu e lo sinta nan mesa cu nan, ora cu nan ta dispuesto pa habri nan bukinan y ora nan ta biba cu ley.

Tanten cu esey no t’e caso, e mandatario no ta dispuesto pa sinta na mesa cu ningun di nan.

Leave a Reply

Top