Minister di Husticia, mr. drs. Arthur Dowers a habri e Cas di Seguridad di Aruba

“Awe ta un dia memorable. Awe nos edificio nobo lo wordo habri pa Minister di Husticia, drs. mr. Arthur Dowers. Y awe e Veiligheidshuis di Aruba tambe lo wordo habri. Esakinan ta dos sucedido hopi especial, cu un Procurador-General normalmente ta experiencia un biaha so den su carera”, asina Procurador General, mr. Alexander Dam a cuminsa su discurso.

 

“Mi ta cuminza cu nos edificio nobo y bunita. Minister di Husticia y ami a wak e ultimo añanan varios edificio pa mira si nan ta pas y ta alcanzable como lugar nobo pa Ministerio Publico di Aruba. Finalmente a scoge p’e edificio nobo bunita aki, cu ta na un sitio bon acesible. Pesey cu un gradicimento den direccion di e Minister di Husticia ta mas cu na su lugar.

E edificio aki ta pas cu Ministerio Publico. E ta radia prestigio y autoridad.

 

Den e edificio nobo aki, mescos cu den esun na Havenstraat, tanto e Parket di Procureur-Generaal, como e Parket di Hoofdofficier van Justitie ta hunto. Ambos parket ta traha diariamente hunto na un manera hopi intensivo pa combati criminalidad.

Un edificio nobo ta nifica tambe un comienzo nobo; un comienzo nobo den combatimento di criminalidad na Aruba. Varios paso a wordo tuma pa cu e meta ey, conhuntamente cu e partnernan den e cadena hudicial, manera Polis, Aduana, Belastingdienst, Kustwacht y Koninklijke Marechaussee”.

 

Mr. Alexander van Dam ta para keto un rato n’e desaroyonan di e ultimo aña aki.

A traha duro den Integraal Afpakteam di Aruba, hunto cu e otro partnernan, pa kita capital criminal. Ademas a traha na un forma integral pa bringa mensenhandel y mensensmokkel. Esaki por unicamente si nos comparti informacion cu otro, manera nan ta bin ta haciendo den Fusion Center di Aruba.

E Fusion Center ta un punto central, unda ta comparti informacion cu nos partnernan den e cadena hudicial, cu como meta pa bringa criminalidad den un forma basa riba informacion.

 

Alabez nan a sigui profesionaliza e organizacion interno di Ministerio Publico, dor di traha mas dirigi pafor. Kier men, mas dirigi riba e ambiente externo. Den practica, e ta nifica mas contacto intensivo cu prensa, p’asina nos como Ministerio Publico por splica pueblo di Aruba y na nos partnernan den cadena hudicial, kico nos ta haci y dicon y tambe kico nos ta para pe.

Pues e ultimo aña hopi desaroyo a start sali. Nos lo sigui cu esaki, pasobra nos no ta cla ainda.

 

Mr. Alexander van Dam kier gradici su trahadornan di curazon pa nan flexibilidad y commitment n’e cambionan, cu a wordo incorpora caba y cu ta na caminda.

Pa futuro nos tin como meta pa bringa criminalidad comun na un forma dinamico, rapido y eficiente.

E manera di traha aki nos ta yama e maneho ZSM, den cual Polis, Ministerio Publico y e partnernan den cadena hudicial ta bringa crimennan comun na un manera dinamico.

Den ZSM ta dicidi mas liher posible, despues di detencion di un sospechoso, con ta bay sigui cu su tramitacion (afdoeningstraject). Ta trata aki di intervencionnan significativo, den cual sospechosonan ta haya un reaccion cu ta pas cu loke nan a haci, y den cual victimanan ta mira nan derecho, y den cual e becindario ta ripara con liher un sospechoso ta wordo coregi.

Tur esaki den un cadena hudicial, den cual e partnernan hunto ta forma un solo cadena y por actua rapidamente.

ZSM kier men na Hulandes: Zo Snel, Slim, Selectief, Simpel, Samen en Samenlevingsgericht Mogelijk.

 

Pa traha na un manera significativo ZSM ta haci uso di diferente forma pa tramita un sospechoso, tambe pafor di Ley Penal. Hunto. Den ZSM, Ministerio Publico, Polis y e partnernan den e cadena hudicial ta para literalmente scouro cu scouro.

Banda di e tarea represivo di Ministerio Publico, ta nos ambicion tambe pa tuma medidanan preventivo pa evita cu hobennen en especial, subi mal caminda.

“Nos como instancianan di Gobierno y organizacionnan social mester percura pa traha mas hunto y pa inverti den nos hubentud den e lucha contra criminalidad. Esun cu ta doño di hubentud, tin e futuro den su man. Esey ta un responsabilidad y na mes momento un opdracht pa henter sociedad y no solamente pa Ministerio di Husticia, Ministerio Publico y Polis.

Tambe e Ministerionan di Enseñanza, Asunto Social y Salubridad Publico ta necesario pa duna hoben y adultonan hoben perspectiva riba un bida yena cu sentido”.

 

Segun PG. Mr. van Dam el a yega n’e di dos motibo di fiesta awe, loke t’e apertura di e Veiligheidshuis of Plataforma di Seguridad di Aruba. “Mi ta hopi gradicido n’e fondo di FDA cu a pone un suma di placa disponible pa realiza esaki.

Top