Minister di Infrastructura Benny Sevinger: Awor cu a cuminsa desmantela ex Bushiri Hotel por sigui cu e plan pa desaroya henter e area

Minister Benny Sevinger, encarga cu Infrastructura, a expresa su satisfaccion cu porfin a cuminsa desmantela e ex hotel y cuminsa desaroya e area pa pueblo di Aruba. Asina Gabinete Mike Eman II ta cumpli cu otro promesa haci na pueblo, pa desaroya henter e area aki pa publico en general.

Pa logra yega n’e punto aki, departamentonan di Gobierno mester a cana un caminda y proceso largo. No solamente e proceso hiba inicialmente pa logra haya un empresa pa renoba e hotel y pone den operacion, cual no a logra, pero tambe mester a haci un inventarisacion di ki tipo di material tin den e instalacionnan prome cu por yega n’e parti di desmantelacion.

 

A base di e raport aki a bay destaho publico y e empresa cu e mihor oferta tabata compania ‘We Build’ di Cornelies van den Broek.

“Hopi aña Bushiri Hotel a keda para manera un ruina y no a contribui cu nada na desaroyo turistico di e producto Aruba. Pesey ta masha importante cu a yega n’e punto aki awe.”

Minister Benny Sevinger a bisa prensa cu e desaroyo di e area di Bushiri ta ensera un plan total cu a cuminsa traha riba dje for di aña 2009, unda a papia cu ta bay renoba producto Aruba y a cuminsa cu e area di centro di ciudad.

 

Den e area di Bushiri tin dos proyecto cu ta bay ta simultaneamente den desaroyo. N’e ex tereno di APA, banda di lama, lo sigui cu ampliacion di Linear Park, conectando cu esun di aeropuerto y ta sigui for di waf te na Watty Vos Boulevard pa yega te na RIU Hotel.

E parti di Bushiri lo bira un espacio publico, cu Mambo Beach bek, cual tabata masha popular bou di e habitantenan di Playa. E espacio publico aki ta ensera hopi mas cu solamente un beach, creando facilidadnan pa practica diferente tipo di deporte y concierto.

Riba loke tabata tereno di APA, a bira masha popular pa organisacion di conciertonan y ta bay construi un Plaza, riba cual por organisa concierto tambe.

 

E plaza mester ta uno multifuncional cu por wordo uza tambe pa actividadnan folklorico, eventonan di arte, cultura y deporte.

“E ta un plan total, un desaroyo completamente nobo. E unico exigencia cu a pone den e proyecto aki ta ta cu e no por ta un competencia pa caya grandi. Pues nada di negoshi mescos cu tin den Caya Grandi.”

P’e motibo aki tambe ta bay traha riba un conexion entre e area di ex Bushiri cu Caya Grandi, pa promove e centro di ciudad. Pero tambe corridor cu ta conecta e beach aki cu e areanan di Madiki, Playa Pabou, Cunucu Abou.

 

“Nos ta hopi contento cu nos vision ta sigui cu desmantelacion di Bushiri. Nos a priminti y nos ta cumpli.”

Un deposito cu a yega di wordo poni dor di un interesado, cu no a cumpli na tempo, ta bay wordo usa p’e trabounan di desmantelacion. E fondonan pa construi e plaza y haci e beach mas grandi, tambe ta aproba caba, Minister Benny Sevinger a bisa.

 

Top