Minister di Relacion Exterior, Bert Koenders: “Na Aruba ta tene bon cuenta pa bienestar y prosperidad ta bon den balansa”

Durante su bishita na Aruba, Minister di Relacionnan Exterior, Bert Koenders a topa cu varios personahe, entre nan e Prome Ministernan di Corsou y Sint Maarten, Koeiman y Marlin. Tambe el a reuni cu Prome Minister Mike Eman y tabata masha agradecido p’e inmenso trabou haci dor di Eman p’asina Hulanda a logra haya un asiento den Conseho di Seguridad di Nacionnan Uni.

 

El a papia tambe encuanto e SDG’nan (Sustainable Development Goals). Un tema importante. Voznan rond mundo ta demanda liderazgo riba topiconan manera pobreza, desigualdad, cambio di clima, cuido medico y educacion pa tur mucha.

Pa contesta e demandanan aki, lidernan di mundo a bin hunto pa discuti e agenda di Prosperidad Duradero cu nan kier alcanza pa aña 2030.

E agenda ta contene 17 punto cu lo funciona como e metanan pa Prosperidad Duradero.

 

Minister Bert Koenders: “E metanan nobo aki (SDG) cu e comunidad mundial a pone su dilanti pa logra ta regarda varios asunto.

Entre otro desigualdad entre homber y muher, mortalidad di mucha y tambe medio ambiente. Na Hulanda nos a institui un comision pa traha riba e SDG’nan aki.

E comision ta bin hunto pa reuni y ta tene bon bista p’e metanan di desaroyo aki wordo cumpli den e añanan nos dilanti.

E ta algo masha importante pasobra ey ta unda bienestar y prosperidad ta topa cu otro den retonan hopi concreto.”

 

Pa loke t’e bishita di Ronald Plasterk na Aruba y e palabranan di satisfaccion cu el a expresa pa loke ta CAFT, e presupuesto y e situacion financiero na Aruba, Bert Koenders a bisa lo siguiente. “Aki na Aruba ta tene bon cuenta pa bienestar y prosperidad ta bon balansa. Esey ta algo hopi importante.

Nos mester percura pa den un economia moderno competitivo den cual nos ta den, pa tin inversionnan riba termino largo pa seguridad financiero y na mes momento inverti den comunidad.

Na mi opinion e balansa ey ta mucho mas mihor na Aruba cu e tabata algun aña pasa.”

 

 

 

Top