Minister di Relacionnan Exterior di Reino, Bert Koenders di bishita na Departamento di Relacionnan Exterior di Aruba

 

Departamento di Relacionnan Exterior a ricibi bishita di sr. Bert Koenders, Minister di Relacionnan Exterior di Reino y su delegacion. Esaki ta e di dos bishita oficial di Minister Koenders na Aruba y e prome biaha cu e ta honra e departamento y su trahadornan cu un bishita di cortesia.

 

Como muesta di aprecio y pa gradici’e pa su papel protagonico den beneficio di Reino y Aruba, Director di DBB, Sr. Edwin Abath, a ofrece un lunch pa den un ambiente ameno combersa di temanan comun y importante ariba e agenda di e relacionnan exterior.

 

Na final di e reunion, director, den nomber di staf y personal di e Departamento di Relacionnan Exterior di Aruba, a obsequia Minister Koenders un bunita buki di Aruba Birdlife Conservation cu portretnan di nos parhanan local.

Un gesto cu a wordo masha aprecia pa e Minister.

 

Sr. Abath a gradicie pa e bon trabou cu el a desplega te cu awor como Minister di Relacionnan Exterior di Reino den beneficio di nos pais y a dese’e y su delagacion un bon continuacion di nan biahe di trabou.

Leave a Reply

Top