Minister di Salud Publico, Cuido di nos Grandinan y Deporte, dr. Carlos “Alex” Schwengle: Outbreak di Zika tabata algun siman pasa caba

 

Minister di Salud Publico, Cuido di nos Grandinan y Deporte, dr. Carlos “Alex” Schwengle hunto cu departamentonan concerni, Departamento di Salud Publico y GKMB p’asina trece un clarificacion di e situacion di Zika. E mensahe tabata specialmente pa trece un claridad di kico e datonan ta, pero tambe pa splica mas riba e situacion di Zika.

 

Na momento aki nan tin dificultad cu dokternan ta bisa cu tin un sospecho di un enfermedad, p. e. den e caso aki Zika. Pa loke ta e cifra Ministerio di Salud Publico ta cana atras y un gran parti di esaki no ta den nan man. Na momento cu realmente tin un outbreak confirma, ya bo ta 2 pa 4 siman atras caba.

 

“Nos a splica nan bon cla, los di e cifranan ey, ya caba na final di aña pasa segun e protocol nacional cu tin, nos no ta bay sinta warda pa cifranan”, Minister Schwengle a remarca.

Nan sa di experiencia si bo tin mas awa, bo tin mas sangura, kiermen hopi mas chens cu bo por haya un outbreak.

GKMB y Departamento di Salud Publico ta manehando caba e situacion manera cu tin un outbreak di aña pasa caba, di cual esaki no ta berdad, asina Minister Schwengle a remarca. Aña pasa no tabatin un outbreak.

 

Loke si ta cu e cifranan a drenta di confirmacion, ta cu algun siman atras tabatin un outbreak. “Na e momentonan aki nos no por papia di outbreak mas, pero e cifranan di awe ta bay drenta aki par di siman. Esey ta un cos cu parcialmente nos no por mehora”, Minister Schwengle a indica. Nan por bay mehora par di cos, pero na final lo keda cu un retraso di 2 pa 4 siman.

Esaki tin di haber cu e tecnica con ta haci e testnan riba Zika y e otronan.

 

Minister Alex Schwengle ta kere cu mester tin un tiki mas di pasenshi y respet y un tiki confiansa, pasobra Aruba ta un di e poco paisnan cu si ta sali afo y bisa cos manera ta. Pero esaki ta wordo haci cu cautela, pasobra no mester lubida cu no ta sconde cifra pero nan kier ta sigur si tin un outbreak. Na momento cu publica cu tin un outbreak, RVA ta publica esaki. E ta parti di International Health Regulation y Aruba ta forma parti di un comunidad internacional.

 

Aruba tin e obligacion di duna cifra, cual ta wordo haci y no manera varios otro pais cu a stop di duna cifra. RVA ta duna e informacion na WHO y PAHO. Y di mes CDC di Merca ta haya sa e cifranan y ta publica esaki.

“E dolor ta e ora bo ta bay haya cu e porcentahe di bo turismo ta haya miedo di bin Aruba”, Minister Schwengle a remarca. Basicamente e miedo t’ey pa full e region Caribense y Sur America y Centro America. “Ban ta cauteloso kico nos ta publica”, e mandatario a supli.

 

Mester actua riba e cifranan concreto y den e caso aki nan a kies y e ta para den e protocol di maneho di DVG y GKMB, cu nan a anticipa cu e lo por bay bira un outbreak y no a sinta warda pe cifranan. A sali di aña pasa caba y nan a step up e maneho.

“Mi ta bisa si cu ta bay bin un adaptacion di e maneho pasobra nos no por afford di keda maneha solamente riba e confirmacion. Nos kier bay step up loke nos tin mas ainda.

Nos a papi’e caba cu nos partnernan manera ATA y AHATA, nan ta di acuerdo cu nos.

Ta bay bin un proposicion, pasobra e ta costa un tiki cen. Full aña nos kier step up nos maneho mas ainda y desde october pa mey aña largo nos kier step up mas ainda.

Nos kier bay haci mas esfuerso ainda cu nos ta haciendo, p’asina nos por duna mas garantia ainda na pueblo cu e maneho ta bon, e control di enfermedadnan transmiti dor di vector, manera Aedes aegypti, ta miho controla. Y Dios duna cu tempo nos por elimina henter e problema aki.

Mundialmente no tin un plan strategico comproba cu berdad bo por elimina Aedes aegypti”, asina Minister Schwengle a termina bisando.

Top