Minister di Salud Publico, dr. Carlos “Alex” Schwengle: A entrega yabinan di e prome fase di Hospital

Diahuebs ultimo tabata un dia special na momento cu SOGA a entrega Minister di Salud Publico, Cuido di Nos Grandinan y Deporte, dr. Carlos “Alex” Schwengle e yabinan di e prome fase di e proyecto di e “New Bed Tower”.

A entrega parti di e trabou cu ta cla, esta e New Bed Tower y  “Electrical Building”. E siguiente stap ta pe partinan nobo, cual ta e edificio principal.

Minister Schwengle a duna pabien na tur cu a participa n’e proyecto aki cu no a bay facil, pasobra tabatin hopi reto na caminda.

 

Parlamento y Ministerraad a keda na altura di tur loke ta pasando y a percura pa tin transparencia durante henter e trayecto. E proyecto ta uno hopi bunita y e ta bay agrega grandemente n’e cuido di Aruba. E lo bay ta un adelanto grandi p’e trahadornan tambe y no solamente pe clientenan.

 

E kambernan lo bay ta pa 1 of 2 persona, pero mayoria di e kambernan lo ta di 1 persona. Minister Schwengle a indica cu e privacidad y espacio lo bay ta uno hopi mas mihor compara cu antes.

Tambe a percura pa mas y mihor privacidad pe trahadornan, lo tin mas espacio pa nan haci nan trabou, mas lugar pa tene reunion den priva y no riba gang.

Lo bay tin espacio tambe pa ora di sinta cu famianan pa duna un noticia, lo bay tin un kamber di espera special pe famianan unda cu tin baño y por keda pasa anochi.

 

Esaki ta un adelanto hopi grandi y structural, pero ta keda na Ministerio di Salud Publico hunto cu hospital pa sigui traha duro y drecha e calidad di servicio.

Hospital ta haciendo esey, tumando hopi curso, invertiendo den calidad di personal, pero tambe den curso di hospitalidad.

Esaki ta pa contribui n’e servicio duna den hospital mes, Ministerio di Salud Publico kier pe trato na hospital mehora cada dia mas y esaki lo pasa segun cu ta bay completando training nan intensivo cu ta tumando lugar caba.

 

A pasa e prome fase y awor lo sigui pe di dos fase, unda cu a topa algun reto den “good governance”. Esaki a bin pasobra tabata falta di transparencia kende lo ta encargo cu cua parti, pero awor esey ta mas cla y Minister a inverti hopi tempo den esaki.

Awor tur cos ta bayendo mihor, unda cu e boluntad di tur t’ey. Tur partner envolvi ta cumpliendo cu e colaboracion y esey ta pone cu ta bayendo mihor.

E tardansa a bin pa motibo cu a agrega salanan di operacion, lo bay tin 6 sala di operacion y na IMSan 3, cual ta pone cu lo tin un total di 9 sala di operacion riba nos isla na lugar di 5.

Esaki ta un adelanto hopi grandi y esaki lo t’e solucion pa cu e tardansa cu tin actualmente den  tempo di espera pa opera.

 

Awo tur partner ta prepara p’e retonan cu ta na caminda pa hospital y e reto di mas importante ta  comunicacion.

Lo tin desordo, leu a leu lo tin stof. E stakeholdernan di hospital ta bon informa, pero tambe lo keda informa pueblo debidamente riba esaki. Nan ta prepara pa cualkier sorpresa cu lo bin, nan lo keda informa otro hopi bon, e trahadornan y pueblo di kico ta pasando den hospital.

Leave a Reply

Top