Minister di Trabao, drs. Paul Croes hunto cu grupo di hende cu ta rondon’e, ta sospechoso den investigacion penal

Bao guia di Ministerio Publico di Aruba, Landsrecherche, den cooperacion cu RST (Recherche Samenwerkings Team) y Cuerpo Policial di Aruba a investiga posible casonan di corupcion activo y pasivo.
E investigacion aki a dirigi su mes riba e sospecho cu Minister di Asunto Social, Hubentud y Trabao, conhuntamente cu varios di su trahadornan, a tuma regalo, promesa y/of servicionan relaciona cu ontheffingnan di e arbeidsmarkttoets, dor di cual stranheronan a wordo poni den oportunidad pa haya permisonan laboral, segun Fiscal Mayor Erick Olthof awe mainta den conferencia di prensa.
E Fiscal Mayor mes a keda sorprendi p’e cantidad di periodistanan presente awe mainta.
Mr. Erick Olfhof, den presencia di Mando Policial, Director di RST, Hefe di Landsrecherche a splica e proceso di ayera mainta.

Durante e investigacion, e sospecho a surgi cu Minister drs. Paul Croes a haci su mes culpable na ambtsmisbruik y a duna personanan cu no tabata mag di traha na Aruba a base di nan verblijfstitel, oportunidad pa traha na Aruba.
Tambe e sospecho a lanta cu e Minister a haci su mes culpable, conhuntamente cu otronan, di intencionalmente laba placa di e sobornonan ricibi.

E sospecho ta cu e ambtelijke corruptie ta consisti primordialmente di pidi y/of tuma sobornonan en cambio di ontheffing di e arbeidsmarkttoets.
Un arbeidsmarkttoets positivo di Departamento di Progreso Laboral (DPL), of un ontheffing di e toets aki, ta un condicion pa dunamento un permiso di trabao na Aruba dor di Departamento di Integracion Maneho y Admision di Stranhero (DIMAS).

Den cuadro di e investigacion, a haci entradanan hudicial awe na 13 diferente lugar (cas, empresanan y un fundacion), bao guia di dos Huez-Comisario encarga cu tratamento di casonan penal.
Den e huiszoekingnan aki, tabata envolvi personal di Landsrecherche, RST, Cuerpo Policial, FIOT (Fiscale Inlichtingen en OpsporingsTeam), FIOD (Fiscale Inlichtingen en Opsporingsdienst di Hulanda) y Marechaussee, cu sosten di otro partnernan strategico.

Durante e entradanan hudicial a confisca administracion y gegevensdragers. Nan lo dura henter dia, segun expectativa. N’e momento aki, Ministerio Publico a opta pa no detene e sospechosonan.
Ministerio Publico y e team investigativo kier prome analisa e documentonan tuma den beslag y demas informacion, y scucha testigonan pa sigui sostene e sospechonan.

Relaciona cu e resultadonan di e analisis y e verhoornan, lo tuma decisionnan tocante persecucion, caminda no ta exclui cu detencionnan lo cay mas despues.
Di acuerdo cu Fiscal Mayor mr. Erick Olthof e motibo di e investigacion aki ta debi na diferente noticia riba Facebook, cu hopi biaha no ta corecto, pero despues di a haci un feitenonderzoek, di tende varios testigo, a conclui pa haci un investigacion penal.
Sigur ora cu integridad ta na discusion, merece un investigacion profundo, cu por tuma algun luna, sib o kier haci un bon investigacion pa trece e claridad den publicidad.

Bisando tur esaki, Ministerio Publico a bari for di mesa, tur otro publicacionnan manera e.o. cu Minister Paul Croes y su señora mas Secretaria ta deteni.
Tambe a keda bari for di mesa, cu tur e investigacion aki tin di haci cu e container di droga cu sali for di Aruba, y cu a keda confisca na Hulanda.

Top