Minister di Trabou, drs. Paul Croes: Cada persona cu nos yuda haya un trabou den refineria, pa mi ta un logra cu ta duna nos alegria

Sin duda algun tabata un momento special y memorabel pa Minister di Trabou, drs. Paul Croes diabierna ultimo ora cu a forma parti di entrega di e prome 100 badge di trahadornan pa refineria CITGO Aruba. Ta un punto culminante despues di añanan di trabou y negociacion pa yega na e fase caminda tata y mamanan di famia tin un trabou y entrada stabel.

 

Minister Croes a splica cu esaki ta apenas e prome grupo di trahador for di contratistanan local cu ta coresponde na e proyectonan den e prome fase di rehabilitacion di e refineria.

Tin mas trahador cu, den futuro cercano, ta bay haya nan badge conforme e proyectonan ta inicia. Di e manera aki, Aruba ta bay cera 2017 rond di 5% di desempleo. E tasa lo ta nada menos cu 7 punto bou di loke tabata bek na 2009.

 

“Den e siguiente dos luna lo tin proyecto ta bay continua”, Minister Croes a bisa indicando cu, “comunidad por tin seguridad cu tin avancenan ta tumando luga.”

Como titular di Trabou den Gabinete Mike Eman II, Minister Croes su prioridad ta pa personal local forma parti di e desaroynan den refineria.

 

Hopi di e trahadornan cu diabierna ultimo a haya nan badge, ta personanan cu ta propone dor di CITGO Desk, cual ta e departamento institui pa Gobierno pa aloca trahadornan Arubiano den refineria CITGO.

Varios di nan a probecha e ceremonia di entrega di badge pa acerca Minister Croes pa gradici’e personalmente pa e esfuersonan haci. Minister Croes a finalisa bisando cu “cada un persona cu nos por yuda pa haya un trabou den refineria, pa mi ta un logro cu ta duna nos alegria.”

Top