Minister di Trabou, drs. Paul Croes ta felicita tur hende muhe di Aruba Boso contribucion na famia, sociedad y pais ta balioso y merece un recompensa husto

“Di e diferente dia cu nos ta celebra den luna di maart aki na Aruba, 8 di maart ta uno special y cu mi ta contento di wak cu ta creciendo. Dia Internacional di Hende Muhe ta un fecha den cual e genero ta uni forsa y ingenio pa avansa den tur tereno necesario, mientras cu e otro mita di e poblacion mundial ta bira mas consciente di nan aporte general; y di e reconocemento y respet cu nan merece pa esaki. Como Minister di Asuntonan Social, Trabou y Hubentud, mi kier a felicita di e manera mas profundo y sincero, tur hende muhe di Aruba riba nan dia”, asina Minister Croes a cuminsa.

 

“E organisacion mundial cu ta celebra e dia aki a scoge como tema pa 2017, ‘Be Bold For Change.’ Curashi ta algo cu atrabes di historia, hende muhe a demostra di tin.

Na un nivel mas personal, mi por bisa cu mi ta yiu di un hende muhe cu a inculca den mi e balornan di ta miembro di un famia y di ta miembro di un comunidad. Mi ta ruman di dos hende muhe profesional cu ta duna mi tur di e ehempel di dedicacion y perseverancia; mi ta casa di un hende muhe cu a siña mi di e poder di amor incondicional; y mi tata di un yiu muhe cu ta yena mi curason di energia y speransa.

 

Esaki, adicional na e profesionalnan femenino cu ta forma parti di mi personal na Ministerio, di tur esnan cu ta lidera fundacionnan na Aruba y mi tin e placer di traha cu nan, di tur trahado y boluntarionan cu mi tin e placer di conoce; ta laga mi para keto y bolbe realisa pa di tantisimo biaha cu, en berdad, nos mundo ta uno hopi miho hende muhe ta riba dj’e.

A pesar di tur nan aporte balioso, e Foro Economico Mundial ta calcula cu desigualdad salarial no lo disparce te na aña 2186”, Minister Croes ta splica.

 

“Naturalmente, esey no ta un idea cu nos por biba cu ne. Mi ta apoya tur esfuerso haci rond mundo pa caba cu e situacion inhusto aki y, mas cu claro, na Aruba na prome luga. E tema di Nacionnan Uni pa Dia Internacional di Hende Muhe ta enfoca riba “Hende Muhe den un Mundo di Trabou cu ta Cambia: Planeta 50-50 pa 2010.” Globalisacion y inovacionnan tecnologico banda di cambio climatico y crisisnan economico y social ta entre e factornan, cu ta sigui transforma nos mundo di trabou. Nan ta ofrece tanto reto, como tambe oportunidadnan pa realisa e potencial economico di hende muhe den un miho futuro”, Minister Croes ta enfatisa.

 

“Estadistica global ta mustra cu awendia 61.5% di hende muhe tin un profesion di servicio, 13.5% ta labora den industria y 25% ta den e sector di agricultura. Pa loke ta trata hende muhe na un posicion di liderasgo, e ser femenino ta representa awendia 23% di asientonan den Parlamento di nan pais, pero apenas 4% di e CEO di e 500 companianan mas grandi na mundo.

Aunke e cifranan local por vari mas den un categoria, cu otro, nos tin hopi trabou pa haci ainda. Mi ta compromete mi mes na haci loke ta necesario pa Aruba, ademas di cumpli cu su meta di sostenibilidad den 2020, tambe nos por ta entre e prome paisnan na mundo pa elimina e desigualda di trabou y salarial den 2030”, Minister Paul Croes a duna di conoce.

Leave a Reply

Top