Minister di Turismo, Transporte, Energia y Ambiente, Ing. Mike de Meza; Tur cos ta riba schedule encuanto perforacion di gas

Na 2009 ora cu Gobierno di Gabinete Mike Eman 1 a sinta, un di e topiconan tabata exploracion den awa teritorial di Aruba. Den pasado a haci esaki caba, pero cu resultadonan negativo.

A bin cu e idea aki p’asina mira si rond Aruba por detecta reserva, of fossiel den subsuelo di nos awa. Di biaha den lunanan di november y december 2009 a cuminsa cu e proyecto di exploracion di gas rond di Aruba, unda cu a sigui cu e proyecto aki den 2010 te cu awo.

Diferente compania a mustra interes den e proyecto aki, pero na final di dia a scoge pa traha cu Aruba mes, esta e compania Repsol, Minister di Turismo, Transporte, Energia y Ambiente, Ing. Mike de Meza a remarca.

 

Na Spaña e compania tin un exito hopi halto y cu tecnologia superior. Na 2009 e compania aki a logra haya reservanan den awa perla di Venezuela y awo nan hunto cu e compania Italiano Enne ta exploita e mina di gas cu tin den awanan teritorial di Venezuela.

Den historia e mina di gas ta esun di mas grandi den Caribe, e mandatario a splica. Repsol ta na Aruba y nan tin como partner e compania Frances, kendenan ta trahando hunto pa cu e proyecto aki.

 

Aworaki ta wardando p’e siguiente trabounan di e fase di perforacion di prueba cuminsa.

Asina cu ricibi un resultado positivo, lo haci un analisis si un reserva/mina asina aki ta confiabel economicamente. Por haya algo, pero e ta costoso pa yega na dje den cantidad chikito of den material inferior. Ora cu haci e analisis, e ora ey por mira si comercial e ta viabel pa explota e mina ey. E fase aki lo inicia na final di e aña aki pa comienso di otro aña.

 

“Una bes cu haci e fase ey, e ora por bay den explotacion, di cual lo explota e reservanan ey.

Aki ta papia di inversionnan sumamente grandi cu ta algun di biyones di dollar y pa cu esaki lo mester traha rates, pa tin e aparatonan necesario pa por ta sigur na momento di explota gas pero azeta tambe”, Minister de Meza a expresa.

Tur esaki lo ta interesante y e lo tin su beneficionan grandi pa pais Aruba.

 

Aworaki ta analisando diferente ley di diferente pais di cual un di nan ta di Europa.

Na Noruega tin leynan hopi strigente. Loke cu kier haci ta pa sigura pa hinca tur esaki den un sistema hopi streng y hopi bon hancra den ley, p’asina no haya ningun politico na Aruba cu lo bay haci mal uzo di algo asina. Den hopi pais por mira cu a haci hayazgonan grandi di reserva di gas y di petroleo, pero ora di kere cu e lo bira un bendicion por bira un maldicion p’e pais dor di diferente metemento politico y comerciantenan cu por haya aceso na decision cu no ta beneficioso p’e pueblo, Minister de Meza ta termina bisando.

Leave a Reply

Top