Minister Dowers a introduci e plan di maneho nobo pa Husticia

Diaranson anochi na Surf Side Marina, Ministerio di Husticia a tene un anochi di informacion encuanto di e plan di maneho nobo 2017 / 2020, cual ta hiba e nomber di, “Iedereen draagt zijn steentje bij aan een veilige samenleving”.

 

Presente na e anochi aki, tabata t’ey mayoria di e hoofd van diensten cu ta cay bou di Ministerio di Husticia, pero tambe varios otro stakeholders como tambe gremionan cu a wordo invita na e anochi aki.

E anochi riba su mes a wordo dirigi y modera pa sr. mr. Luciano Milliard di Universidad di Aruba, caminda cu hopi informacion a wordo comparti cu un sala completamente yen.

 

E criminoloog, esta sra. mr. Simone van der Zee, a duna un amplio splicacion den comportamento di un persona dependiendo di su situacion durante su proceso di crecemento. Segun e criminoloog, cu e prome 6 aña di un mucha ta esencial pa e ricibi un bon guia for di su mayornan. Sra. Simone van der Zee a duna dos di ehempel con sierto situacionnan na cas por afecta e comportacion di un mucha segun cu e ta crece.

P’esey e criminoloog ta di opinion cu e ta di sumo importancia, cu un famia no solamente mester consisiti di mama y tata of al menos un figura paternal, pero mas bien cu e mama y tata ta brinda e mucha e atencion y guia corecto pa e por crece cu norma y balor.

 

Despues di su splicacion amplio como experto rib’e materia aki, Minister di Husticia, mr. drs. Arthur Dowers, a hiba palabra y a splica kico tur ta e contenido den e plan di maneho nobo pa 2017 / 2020. E titular di Husticia a splica cu despues cu e base a wordo poni entre 2013 pa 2017, awor lo enfoca rib’e continuidad di esaki.

Minister Dowers a remarca cu un di e retonan grandi cu su persona tabatin ta pa logra cu diferente departamento traha di un forma mas estrecho cu otro y cu awor, esta algo mas di 7 aña despues e ta mira cu e la duna su resultadonan positivo.

 

P’esey mes cu e titular encarga cu Husticia ta convenci, cu esaki ta trahando na bienestar di nos comunidad y cu pa tal motibo mes tambe cu awor aki lo bay implementa e plataforma asina yama ‘veiligheidhuis’. E veiligheidhuis aki lo wordo forma pa diferente departamentonan kendenan lo bay tin un rol importante den e parti di prevencion, den e sentido general.

 

Por ultimo, sr. Jairo Boekhoudt, a duna un presentacion di un aplicacion digital, como un herment moderno pa yuda den e area di prevencion of miho bisa pa suministra informacion den e caso aki na Cuerpo Policial.

Sr. Boekhoudt a splica cu su persona tin varios luna den discucion hunto cu Minister Dowers rib’e topico di prevencion y cu su compania a haci un estudio gratuito pa contribui na nos comunidad rib’e topico di seguridad.

 

E plataforma y/of aplicacion digital aki (app) a haya un hopi bon acogida cerca tur es nan presente, despues cu sr. Boekhoudt a duna un amplio splicacion riba esaki.

Segun comentario nan di sr. Boekhoudt mes, cu e ta masha contento cu Minister Dowers a brinda su persona e oportunidad aki, mientras cu Minister Dowers a remarca cu ta netamente e idiologia aki su persona y e Gabinete completo ta purba di inculca den nos comunidad y e ta contento cu e mensahe ta yegando cada bes mas y mas den nos comunidad.

 

Na final di e presentacionnan, publico tabatin e oportunidad pa duna remarke como tambe haci preguntanan, di cual varios persona den publico a haci uso di e oportunidad aki.

Tambe Minister Dowers a percura pa tur es nan presente ricibi copia di e plan di maneho.

E intencion ta, pa a corto plazo hiba un discusion riba un nivel academico, cual lo bay tuma lugar den e aula di Universidad di Aruba, caminda cu pa e anochi aki lo bay tin varios criminoloog tambe presente pa cu e debate.

Top