Minister dr. Alex Schwengle: Aruba International Half Marathon tabata un exito rotundo

 

Den fin di siman Aruba a conoce su di 32 Aruba International Half Marathon. Den transcurso di añanan e evento a crece y bira grandi, hasta diversificando; E aña aki a inclui un “relay” (relevo) pa coredonan di e categoria Paralympico.

E coredor Arubano bon conoci, esta Beto a core hunto cu un coredor internacional, y dos otro coredor.

Tabatin diferente otro categoria di relay manera studiante, banda di e tradicional categorianan “Male” y “Female”.

 

Minister di Salud Publico, Deporte y Cuido di Nos Grandinan, dr. Alex Schwengle a presenta tanto n’e “start” como n’e “finish line” y ta hopi contento y satisfecho cu e desaroyo di e marathon como evento, y e cantidad grandi di participantenan entusiasma.

E mandatario a splica cu e mes tambe a train pa core e 21 kilometernan, for di Joe Laveist Sport Park pa Alhambra Casino, pero debi na su schedule di warda na hospital no por a risca participa, pero e ta sigui train y tin tur intencion di participa otro aña.

 

Por mira na Aruba cu cada dia mas hende ta move, mas hende ta core, participa na caminatanan y practica un of otro deporte. Esaki ta un desaroyo sigur tumando lugar e ultimo 8 añanan, y Aruba como comunidad lo mira e frutonan den 10 pa 15 aña, e ta agrega.

Pa engrandece e cultura di “move” y “haci deporte” ainda mas, ta introduciendo e programa di Gezonde Scholen na tur scol, y ta stimulando mas “schoolsport” bao di e hubentud di nos isla, pero tambe ta sigui encurasha adulto y adultonan mayor pa move mas, y participa na caminatanan, etc.

 

Minister Schwengle ta remarca cu tur cu ta contribui n’e procesonan aki mester ta hopi orguyoso di e exito cu ta logrando, esaki ta inclui sigur tambe tur e sponsornan cu ta sostene adicional di  eventonan grandi, manera e half marathon, tambe ta contribui na tur otro eventonan deportivo grandi y chikito.

Un bida sano ta resulta den un comunidad mas happy y ser humano mas saludabel durante di henter nan trayectoria di bida, Minister Schwengle a conclui bisando.

 

Hopi esfuerso adicional ta wordo haci pa stimula y engrandece turismo di deporte, esta turistanan cu ta bishita Aruba specificamente pa participa na un torneo, careda of otro evento deportivo.

Un di e iniciativanan cu ta den su fase di evaluacion serio, pa medio di planning pa cu e parti financiero y un estudio di sostenibilidad ta un “beach stadium” pa Aruba.

E lugar ideal, unda cu no tin interferencia cu e beach, ta Bushiri, pero e stadion por wordo construi otro caminda tambe, e Minister ta bisa.

 

Relaciona n’e futuro proyecto aki tin un investigacion di presupuesto tambe tumando lugar. Minister Schwengle ta splica cu mester pensa riba torneonan grandi di beach rugby, beach volleyball, beach tennis y beach soccer.

Esakinan lo cubri 4 luna pa aña y eventualmente lo por uza e stadion pa eventonan di entretenimento y otro deporte.

Sport Tourism ta un mercado niche cu por pusha y e Minister a laga sa cu e intencion ta pa reuni cu Aruba Tourism Authority tocante di e oportunidad y posibilidadnan.

 

Bolbiendo bek n’e Half Marathon, Minister Schwengle a felicita y gradici tur participante, boluntario y e teamnan di organisacionnan manera IBiSA y Rode Kruis pa cu e evento sumamente exitoso.

 

 

 

Top