Minister Dr. Alex Schwengle fondonan crea dor di Lotto lo permiti hiba deporte dilanti Pronto lo cuminsa renoba e Piscina Olimpico na Savaneta

Minister di Salud, Cuido di Nos Grandinan y Deporte, dr. Alex Schwengle a bishita siman pasa Piscina Olimpico, Roly Bisslik na Savaneta.

El a haci un recorido den e lugar y por constata cu diferente facilidad deportivo ta den un necesidad grandi pa wordo renoba y esey tambe t’e caso di e Piscina Olimpico.

Minister dr. Alex Schwengle a laga sa cu ta trahando riba e “business case” hunto cu WEB Aruba NV pa bay renoba e Piscina Olimpico completo.

Esun di San Nicolas lo wordo renoba despues. P’esaki tambe tin fondonan disponibel y ta wardando p’e plannan keda cla. E ora lo cuminza cu e renobacion necesario.

 

Tin deseo pa bin cu un di dos piscina, un oficina y te hasta un dak cu solar panelnan cu ta cubri e piscina.

“Esey ta cosnan cu lo bay gradual. E prome necesidad ta pa renoba, drecha e daknan, e sistema electric y  e pool mes.”

A drecha caba e sistema di pump, e tuberia y e filternan, pero ainda falta hopi pa haci, e mandatario a agrega.

E situacion aki tabata conoci p’e Minister, pero a tarda un tiki pa por a yega n’e fondonan.

 

E adaptacion di e contrato entre Lotto y CBM ta bay permiti mas fondonan disponible pa por cuminza cana e caminda y atende e necesidadnan di un forma gradual.

Placa ta hunga un factor, pero maneho ta otro, Minister di Salud, Cuido di nos Grandinan y Deporte  enfatiza.

Actualmente ta den e fase pa mehora e maneho unda cu ta bay institui e stichting di FFD cu lo ta esun encarga  di e poolnan.

 

“Mi ta garantiza cu e maneho lo bay mehora den curso di e aña aki pa otro aña”. Cu esaki por garantiza un bida largo p’e facilidadnan, no solamente p’e Piscina Olimpico, pero pa tur e otro facilidadnan deportivo tambe, Minister Schwengle a señala.

Banda di esaki Minister a añadi cu mester bay uza e recursonan di un forma mas eficiente. Mester para habri tambe p’e criticanan cu lo por tin pa esey.

 

“Mi ta haya un lastima cu cierto politico ta sali afo papia bagamunderia, den e sentido di echt gaña flagrantemente”.

E Gobierno anterior a laga Lotto pa Deporte bancarota basicamente, cu un debe di mas di 40 miyon y cu 7 miyon cu no sa unda el a bay.

Oposicion  ta lubida pakico Gobierno a haya su mes forza pa sera un deal asina pa rescata Lotto e tempo ey.

N’e momento aki a casi redobla e omzet di Lotto pa Deporte. Deporte lo haya mas placa cu nunca y e cifranan a wordo mustra tambe den Parlamento.

 

“Mi ta haya un berguenza cu ta hungando politikeria riba lomba di deporte. E berdad t’asina aki, e Gobierno anterior a laga Lotto bancarota, CBM a tuma e riesgo di haci e business pa Lotto.

El a rescata Lotto, berdad cu esey tin su prijs plaatje y no e cifra cu ta nombra. Lotto ta preparando pa publica un relato demostrando e cifranan di e ultimo aña y nan tin cu mustra e diferencia tambe den e cantidad di placa cu Lotto tabata produci y cuanto porcentahe tabata bay pa deporte y kere mi cu ta menos cu 10%”.

 

Minister Schwengle a agrega cu actualmente casi 20% di cada florin cu ta wordo produci dor di Lotto ta bay pa deporte. Esaki ta bon pa informa nos pueblo y di esnan cu ta papia cosnan sin sentido.

Finalmente Minister Schwengle a expresa cu un di e leynan cu mester bin ta e ley di catochi pa regula e wega di placa cu tin den casino, pa locual ta toca catochi y Lotto, tur hende mester paga nan fareshare pa hiba deporte padilanti.

 

Top