Minister dr. Alex Schwengle na despedida di delegacion Olimpico

Aruba ta orguyoso di su atletanan y tur esunnan cu a contribui na nan exito

Deporte di rendimento halto ta exigi por lo menos seis ora di entrenamento pa dia; e trainingnan y proceso pa yega na cualificiacion ta intensivo.

Asina Monica Pimentel, kende ta representa Aruba den e deporte di taekwondo na Weganan Olimpico 2016 a laga sa durante di e tradicional ceremonia di despedida pa e delegacion di Aruba organisa pa Comite Olimpico di Aruba (COA).

Minister Schwengle (2)Monica Pimentel ta un di e shete atletanan cu a cualifica y e hoben ta splica cu e tabatin hopi tempo preparando den exterior, cual ta algo cu mayoria di e atletanan di Aruba a haci.

Basicamente Pimentel no tabata na Aruba mes.

El a pasa hopi tempo na Korea, y a haci un circuito di diferente campeonato pa por logra su cualificacion nan luna di maart.

El a participa na cuater competencia den dos luna, bishitando cinco pais, incluyendo su di cinco competencia, durante cual el a logra cualifica.

Ademas di su training, su programa tabata inclui hopi reunion y combersacionnan cu su coach.

E esfuersonan tabata hopi grandi.

Minister Schwengle (1)Minister di Deporte, dr. Alex Schwengle a expresa tambe na varios ocacion, den su discurso y declaracionnan na prensa, su admiracion y respet pa e shete atletanan di Aruba cu ta forma e nucleo di Team Aruba pa Weganan Olimpico Rio 2016.

Durante di ceremonia di despedida, un tradicion di COA, Minister Schwengle a comenta cu e grupo di atleta aki a haci historia, unda cu pa di prome biaha Aruba tin shete atleta cu no tin “wild card”, pero a cualifica.

Esaki ta algo unico cu a rekeri un sacrificio grandi pa hopi aña di parti di e atletanan y nan mayornan, pero tambe ta hunga un rol importante esunnan cu ta percura pa un sistema di sosten, esta nan clubnan, federacionnan, Aruba Sport Uni, COA, Lotto y Gobierno.

E mandatario a agrega cu si awe Aruba tin shete atleta cualifica, ta un hecho cu e meta ta pa tin mas atleta na e siguiente Olimpiada.

Pa logra esaki, mester sigui inverti den deporte, mester sigui inverti den transparencia y uza e fondonan na e forma corecto. E inversionnan di e ultimo añanan ta dunando nan frutonan.

Minister Schwengle a expresa tambe su gratitud na e diferente compania priva cu a contribui na COA, y e atletanan manera Aruba Bank y Totto.

Cu nan contribucion ta yuda engrandece deporte y ta un sosten necesario como cu e realidad ta cu no por steun solamente riba Gobierno pa e fondonan necesario.

Entre tanto, e Minister a laga sa, cu ta purbando tambe pa logra haya mas fondo for di Lotto pa Deporte, e. o. y e ta gradici companianan priva pa ta dunando mas aporte na deporte.

Minister Schwengle a bisa cu e anochi di despedida tabata tambe e momento pa brinda e atletanan “bonbini den nos curazon” como orguyonan nacional.

Durante di e ceremonia di despedida ta rindi honor na e atletanan, y ta inclui nan mayornan, famia, amigo, federacionnan, dirigentenan di nos pais, Lotto pa Deporte, tur comision di COA cu ta forma parti di e proceso di preparacion di e atleta.

Secretario General di COA ta sumamente contento y orguyoso cu e shete atletanan cu a marca un momento den historia di deporte y participacion Olimpico pa Aruba.

Cu hopi orguyo el a anuncia cu dia 5 di augustus ta spera cu henter comunidad di Aruba lo ta claba na television pa wak Philipine van Aanholt, Nicole van der Velden y Thijs Visser (Sailing), Mikel Schreuders y Allyson Ponson (Swimming), Jayme Mata (Judo) y Monica Pimentel (Taekwondo) carga bandera di Aruba na e ceremonia di apertura di e weganan.
El a conclui bisando cu e uniformnan pa e ceremonia di apertura a wordo diseña pa Magaly Maduro y confecciona pa HK Tailors; y e uniform deportivo ta un regalo di Totto.

Top