Minister dr. Alex Schwengle ta boga pa mehoracion di estilo di bida pa mantene riñonnan saludabel Enfermedad di riñon tin un impacto negativo riba calidad di bida

Minister di Salud Publico, dr. Alex Schwengle tabata presente den fin di siman n’e actividad anual organisa pa IMSan relaciona cu e conmemoracion di Dia Mundial di Riñon.

World Kidney Day ta haya atencion henter e siman aki na Aruba pa medio di diferente actividad y accion di conscientisacion pa promove un mihor cuido di e organonan vital aki.

Tur diferente organisacion y departamento cu tin di haber cu cuido di riñon ta uni pa un programa special pa pacientenan di dialyse, pacientenan cu tin diferente complicacion di nier y comunidad en general.

 

Kidney Disease and Obesity, Healthy Lifestyle for Healthy Kidneys t’e tema mundial pa 2017. Enfermedad di Riñon y Obesidad, Estilo di Bida Saludabel pa Riñonnan Saludabel. Y, un biaha mas Minister Schwengle ta recorda nos comunidad cu ta importante pa tur hende bebe (mas) awa, come menos salo, preveni y mantene un bon control di malesanan manera presion halto y diabetes y haci ehercicio.

E actividad den fin di siman na IMSan tabatin actividadnan pa entretene e muchanan, hopi informacion, y hasta demostracion pa adultonan siña con pa traha snacknan saludabel.

 

Un estilo di bida no ta caro, pero ta pa un gran parti consisti di mihor scogencia, Minister Schwengle a subraya.

El a agrega cu ta berdad cu fruta y berdura na Aruba ta importa y naturalmente lo costa un poco mas cu si cumpra nan na un pais cu ta produci nan, pero asina mes tin opcionnan y ta bon pa esnan cu kier siña mas acudi na un dietista/nutricionista pa combersa tocante diferente escogencia cu nan lo por haci.

 

Si cambia un custumber dañino pa un custumber bon, por ehempel stop di cumpra sigaria, stop di come demasiado chips y en cambio inverti e placa aki den mihor cuminda, esaki sigur lo faborece e estado di salud di e persona, segun Minister Schwengle.

E mandatario a subraya e impacto cu riñonnan cu ya no ta traha bon of no ta traha mes mas tin riba e calidad di bida di e paciente cu mester tuma dialyse.

 

Finalisando el a splica cu e paciente ta perde practicamente tres dia completo di cada siman p’e bay tuma dialyse y ta consehabel pues pa tur paciente cu por posiblemente preveni y evita daño (mas) grandi na nan riñon, pa nan haci nan best pa logra keda mas largo posibel mas saludabel y consecuentemente cu un mihor calidad di bida.

Top