Minister dr. Alex Schwengle ta provee hermentnan pa yega na “Good Governance”

For di aña pasa, Minister dr. Alex Schwengle a cuminsa cu e proceso pa tur organisacion cu ta resorta bao di su Ministerio ricibi e hermentnan y cumisa e proceso pa yega na “good governance” den organisacionnan trahando den area di salubridad, deporte y cuido di hendenan grandi. Particularmente ta aplica pa esunnan cu ta ricibi subsidio for di Gobierno.

 

E di tres workshop den e trayectoria a tuma luga diasabra na Bestuurskantoor. Hopi organisacion e. o. Departamento di salud, Wit Gele Kruis, IMSan, SABA, Lotto pa Deporte, Comite Olimpico Aruba (COA), ASU, UO AZV, Club Kibrahacha, FFD, IVA, Cas Marie, IBiSA, Sport Subsidie Commissie y SVb ta haciendo pa algun tempo caba di nan parti loke mester pa yega na e status di “Bon Gobernacion”, unda cu no solamente ta refleha kico nan ta haci cu e fondonan, pero tambe ta relata nan proceso di decision pa cu e fondonan aki.

 

Di parti di Centro Kibrahacha, un organisacion cu ta provee oportunidanan pa recreo, movecion y diberticion pa hende grandi den forma di un club social, tabata presente e. o. Dick Groenen, kende ta miembro di e “Raad van Toezicht” di parti di Rotary Club.

 

Rotary Club ta e organisacion cu a funda Centro Kibrahacha y ta sigui despues di mas di tres decada como un di e sostenedornan mas importante di e club.

 

Groenen ta splica cu for di ya seis luna pasa e structura di maneho di Centro Kibrahacha ta conociendo cambionan grandi den cuadro di  adaptacionnan necesario pa cu e club mes en general y pa cu e rekisitonan cu Ministerio di Salud Publico ta pidiendo pa yega na bon gobernacion den tur organisacion cu ta ricibi subsidio for di dj’e. E comision di supervision ta di acuerdo cu e modelo di maneho nobo cu nan ta introduciendo.

 

Director di Centro Kibrahacha, Jeffrey Matos, a expresa cu e ta haya e workshopnan un tremendo iniciativa di Minister Schwengle, hunto cu e introduccion di e sistema di subsidio nobo. E workshopnan ta conecta bon cu e proceso cu Centro Kibrahacha ta pasando aden.

Matos a agrega cu Centro Kibrahacha tin un bon team di hende cu experiencia relevante tanto den su directiva como den e comision di supervision.

El a bisa cu nan ta kere den e sistema di subsidio nobo y a cuminsa prepara p’e y ta convenci cu nan lo logra yega nan metanan pa cu good governance. E tipo di encuentronan manera esun organisa diabierna sigur ta un sosten den e proceso, el a remarca.

 

Centro Kibrahacha ta traha riba e parti preventivo, unda cu tin e meta pa provee servicionan pa personanan di edad 60+ cu ta yuda mantene nan socialmente bezig, saludabel y activo.

 

E aña aki lo tuma luga un investigacion nacional pa determina kico e necesidadnan ta pa recreo entre nan grupo meta p’asina ofrece miho servicio na e comunidad. Tur hende kier bira grandi, pero mester enfoca tambe riba bira grandi y biba cu calidad, esaki ta un tarea cu henter e comunidad ta responsabel p’e y no solamente Gobierno, e famia of un fundacion. No ta descarta cu Centro Kibrahacha lo conoce un expansion, pero esaki ta algo cu e investigacion lo mester mustra, si tin un necesidad pa mas centro, of tin suficiente sosten caba.

 

Di parti di Comite Olimpico Arubano, Nicole Hoevertsz a expresa cu e workshopnan ta haya e apoyo completo di COA. Implementacion di good governance ta un exigencia di Comite Olimpico Internacional y tambe di federacionnan internacional individualmente.

Hoevertsz a splica cu p. e. mescos cu COA, organisacionnan local manera e bond di futbol y e bond di landamento, respectivamente liga internacionalmente na FIFA y FINA, ta den e proceso caba pa introduci reglanan di bon gobernacion como un exigencia di e organisacionnan internacional.

 

COA ta bezig caba for di anja 2008 cu e sistema nobo y ta bezig for di 2015 cu e tema bao di e federacionnan local. El a afirma cu e federacionnan a brasa e sistema. No por ta asina cu un organisacion ta traha cu fondonan publico, y subsidionan priva y nan no ta duna cuenta adecuadamente di loke ta pasa cu e fondonan y pakico. Transparencia ta e palabra magico, el a remarca y esaki ta encera tambe transparencia pa cu e proceso di tuma decision.

 

Reglanan riba papel ta importante, pero mas importante ta nan aplicacion den practica, Nicole Hoevertsz a comenta, anjadiendo cu ta bon pa sa cu ta masha hopi organisacion mundialmente ta pone enfasis riba good governance como parti di nan fundeshi, y cu – mescos cu Ministerio di Salud Punlico, Deporte y Cuido di Nos Grandinan – nan ta introduci’e dunando tempo na esunnan cu mester traha riba esaki den nan mesun ceno y ta ofrece un periodo di transicion; e implementacion ta bay progresivamente.

Top