Minister drs. Paul Croes ta atende reunion y forum di “International Labor Organization”

Dia 22 pa 24 di februari proximo, e “International Labor Organization” ta realisando dos evento importante dedica na region di Caribe.

Minister drs. Paul Croes mescos cu homologonan di Trabou di otro islanan, ta participando pa papia riba topiconan importante di e sector y keda na altura di e tendencianan nobo.

E encuentro, cu ta tuma luga na Jamaica, tambe ta reuni representantenan di e Congreso Caribense di Trabou y e Confederacion Caribense di Dunadornan di Trabou, sociedad civil y tambe Nacionnan Uni.

 

Diaranson 22 ta pone rib’e programa un forum cu ta bay samina e factornan tras dic ambio y con nan ta afecta e mundo di trabou den Caribe, identificando e accionnan proactivo necesario pa forma e futuro cu Caribe tin mester di dj’e. E forum ta enfoca riba tres tema pa medio di discusionnan; nan ta: trabounan decente pa tur, maneho publico di trabou y organisacion di trabou y produccion.

Consecuentemente, ta bay celebra e di 10 Reunion di ILO cu Ministernan Caribense di Trabou.

E topico na mesa ta: “Realisando Trabou Decente bou di e Agenda 2030.”

E aña aki e reunion ta presenta e oportunidad di tin un intercambio rib’e retonan continuo pa promove un proceso di crecemento mas inclusivo y sostenibel, cu mas y miho trabou, como tambe permiti e Ministernan pa articulo y comparti nan perspectivanan rond di e futuro di trabou.

 

Minister drs. Paul Croes ta masha entusiasma cu e oportunidad cu ambos actividad ta presenta di conoce strategia y practicanan cu por wordo aplica na Aruba pa mehora e tereno di trabou y condicionnan di trabou pa e trahadornan di Aruba, den diferente aspecto y na diferente nivel.

Top