Minister Hooyboer-Winklaar a informa Bisdom riba su desconfiansa den SMOA

Minister Hooyboer-Winklaar di Enseñansa y Famia a informa Bisdom di Willemstad pa cu e situacion den Stichting Middelbaar Onderwijs Aruba (SMOA) y Colegio Arubano, y a pidi intervencion urgente.

Esaki despues cu OCCA, e comision di mayor di Colegio Arubano a bati alarma riba e decision di e Rector interino y SMOA pa cu retiro masal di docentenan y diferente otro incidente pa cu e personal di e scol. Mescos cu OCCA, Minister di Enseñansa ta indica den su carta na Bisdom di ta hopi preocupa p’e continuidad na Colegio Arubano y p’e interes general di studiante y docentenan di dicho scol.

Conforme e denominacion di Colegio Arubano y e statutonan di SMOA e hunta di supervision ta consisti di un miembro cu ta wordo apunta pa Bisdom di Willemstad, un otro miembro cu ta wordo apunta pa comision di mayor OCCA y e demas miembronan ta wordo apunta dor di e dos miembronan aki cu ta wordo considera e miembronan primordial.

Mirando cu OCCA, siendo parti nan mes di e Hunta di Supervision di Colegio Arubano ta bati alarma ta un indicacion fuerte di un situacion sumamente problematico y preocupante den SMOA. Lamentablemente mester constata cu actualmente conforme e structura Gobierno como stakeholder y subsidiario no ta wordo representa den SMOA.

Minister Hooyboer-Winklaar ta indica den su carta cu e situacion actual t’e resultado directo di e ultimo cambionan di statuto di SMOA cu ta contra ley y tambe dor di e maneho autoritario y solista di e Presidente di e Hunta di Supervision sr. Bart Kool. Segun e mandatario Ministerio di Enseñansa, riba conseho di Departamento di Asunto Huridico di Gobierno, na mas cu un ocasion a informa SMOA cu a cambionan di statuto ta contra ley y cu si esakinan no wordo ahusta bek cu lo por tin consecuencia grandi pa cu e relacionnan di autoridad y responsabilidad interno y externo.

Den e carta na Obispado e titular di enseñansa ta cataloga e relacion y comunicacion cu SMOA y particularmente cu sr. Bart Kool e ultimo añanan aki como sumamente dificil y casi imposibel. E Minister ta haci referencia aki na tur e incidentenan di e ultimo añanan entre Gobierno y SMOA cu a conduci na casonan den Corte entama dor di SMOA di cual tur a sali negativo pa directiva di scol.

Como esun mas recien ta menciona e debate rond di e nombramento di e candidato pa Rector nobo di Colegio Arubano unda cu SMOA a ignora tur ley y regla vigente y ta opta pa bolbe manda Gobierno Corte sin ningun base.

Minister Hooyboer-Winklaar ta haya esaki hopi lamentabel y ta indica cu tur esaki tabatin un impacto sumamente negativo riba ambos personal y studiantenan di e scol. Den e carta na Obispado e titular di enseñansa ta indica di a perde confiansa completo den e Presidente di Hunta di Supervision di SMOA, kende a wordo apunta dor di Bisdom den pasado.

E mandatario ta pidi pa retiro di inmediato di sr. Bart Kool mirando e falta di confiansa como tambe a base di e hecho cu sr. Bart Kool a pasa su termino stipula p’e statutonan como miembro di SMOA.

Aunke Ministerio di Enseñansa no a ricibi confirmacion oficial, mientrastanto por a tuma nota den medionan di prensa cu sr. Bart Kool a anuncia su retiro como Presidente di SMOA. Minister Hooyboer-Winklaar ta indica cu otro siman lo tene un reunion cu Obispado y OCCA pa discuti e futuro di SMOA y Colegio Aruba.

E mandatario ta enfatisa cu hunto mester yega na un structura cu ta refleha e interes general y ta conta cu sosten di tur e stakeholders cu ta envolvi.

Top