Minister Hooyboer-Winklaar: Gobierno ta aproba cambionan importante y positivo pa Arubalening

Minister Hooyboer-Winklaar ta contento di por anuncia cu recientemente conseho di Minister a aproba un nota di maneho cu a wordo entrega, cu ta inclui cambionan den interes, e periodo pa paga e lening bek, y un aumento di e suma maximo di Arubalening pa Merca y Canada.

 

E decision aki ta den cuadro di e maneho di gobierno pa haci studia den region, specificamente Merca y Canada, mas accesibel pa nos studiantenan di Aruba.

Minister Hooyboer-Winklaar ta menciona cu tin un interes y necesidad grandi pa opcionnan di estudio na Merca y Canada.

 

“Nos kier crea mas opcion pa nos hobennan y ta haye di suma importancia pa crea e condicionnan necesario pa tur studiante por logra nan meta na e pais y instituto di nan preferencia”, e mandatario ta enfatisa.

Segun Minister Hooyboer hunto cu esaki e ta importante pa keda duna tur informacion relevante pa asina studiantenan por ta bon informa y por haci nan escogencia na un manera responsabel.

 

E titular di enseñansa a formalisa varios acuerdo importante den e ultimo 3 añanan cu institutonan Mericano y Canades pa asina logra beneficionan financiero pa studiantenan di Aruba unda cu ta baha e gastonan di estudio considerablemente. No obstante esaki a constata cu e suma maximo di Arubalening, compara cu DUO lening di Hulanda, ainda no ta cubri tur e gastonan envolvi. Mientras cu tin un grupo grandi cu kier considera e opcion di studia na Merca y Canada e parti di financiamento a keda forma un drempel pa studiantenan y mayornan scoge pa e opcion di estudio aki.

 

Actualmente e suma maximo di Arubalening pa Merca y Canada ta Afl. 102.000,- y awo cu e aumento cu a keda aproba e suma maximo nobo ta bira Afl. 140.000,-. E ahustacion aki lo ta na vigor entrante di aña academico 2017-2018 y ta conta pa tur studiante cu a aplica caba of ta bay aplica pa Arubalening pa bay studia na e paisnan menciona desde e aña academico nobo.

E ahustacion ta valido tambe pa tur studiante existente cu actualmente ta na Merca of Canada y cu lo kier bin na remarca pa e suma maximo nobo.

 

Segun e calculacionnan e suma maximo nobo di Arubalening pa Merca y Canada ta yega awo mas cerca di e gastonan total pa biba y studia na e institutonan na Merca y Canada cu Gobierno di Aruba tin areglo di instante tuition of areglonan di descuento of scholarships special.

Minister Hooyboer-Winklaar ta menciona cu e decision di e aumento mester a bay na un manera responsabel mirando cu no kier a hisa e suma sin mas, paso e ta importante pa tene na cuenta e suma cu mester paga bek na debe di estudio.

 

Segun Minister Hooyboer-Winklaar, “Nos kier haci studia afo mas acesibel pa tur studiante cu tin e ambicion aki y alabes alivia e peso pa e mayornan, pero nos kier evita cu despues e peso mester cay rib’e studiante unabes e finalisa su estudio. Cu e cambionan aki, nos ta kita cualkier obstaculo cu por a existi, y duna e studiante e oportunidad pa focus riba escogencia di e miho programa y pais cu ta “fit” miho cu nan interes.”

 

Mirando esaki e proposicion di e titular di enseñansa ta pa baha e porcentahe di interes di estudio pa tur studiante cu un Arubalening na 2% di interes y pa hisa e tempo maximo pa pago di debe di estudio di 15 aña pa 20 aña. Tur esaki pa reduci e debe di estudio pa nos studiantenan y pa duna nos studiantenan mas espacio pa cumpli cu e pago di debe di estudio unabes nan cuminsa traha. E mandatario ta confirma cu e proposicion aki tambe a keda aproba y a conta cu sosten completo di conseho di Minister.

 

Minister Hooyboer-Winklaar ta sumamente contento cu un otro logro mas na beneficio di nos studiantenan y ta convenci cu tur e cambionan aki na final di dia no solamente lo tin un impacto positivo pa nos studiantenan, pero tambe pa e posicion social economico di nos pais.

Top