Minister Hooyboer-Winklaar: Pa prome biaha ta conduci “Colegio toets” nacionalisa pa admision pa HAVO/VWO

Un grupo grandi di alumno di scolnan basico di Aruba ta participa e siman aki na e Colegio toets, cu ta forma un componente pa admision na ciclo basico di HAVO/VWO. Dia 6 y 7 di april e toets aki ta tuma luga na ambos Colegio Arubano como Colegio San Nicolas.

 

Na Colegio Arubano un total di 341 alumno procedente di diferente scol basico por a participa na e toets mientras cu pa Colegio San Nicolas e cantidad aki ta 79 alumno. Compara cu antes e toets e aña aki ta tuma luga riba dos dia, en bes di un solo dia.

 

Importante pa remarca cu e aña aki ta pa prome biaha cu e Colegio toets a wordo nacionalisa y ta bou di coordinacion y responsabilidad di Examenbureau di Departamento di Enseñansa conhuntamente cu e scolnan secundario. Esaki ta a base di decision di Minister di Enseñansa cu a tuma iniciativa pa adapta e ley cu ta regula admision pa asina crea normanan di admision mas transparente y husto.

 

E prome fase di e cambio cu a tuma luga aña pasa tabata encera un adaptacion y tambe nacionalisacion di e normanan di admision, unda cu e admision pa HAVO/VWO no ta solamente depende riba e resultado di e toets pero cu ta considera otro componentenan pa asina duna un bista mas amplio y balansa di e capacidadnan y potencial di e alumno.

 

Un otro cambio importante di e prome fase tabata cu a nacionalisa e normanan, cu ta significa cu no ta e scolnan di HAVO/VWO so por dicidi y determina esaki pero cu esaki mester wordo formula conhuntamente cu Departamento di Enseñansa y Dienst Inspectie van het Onderwijs cu aprobacion di Minister di Enseñansa.

 

E di dos fase di e adaptacion a sigui e aña aki cu e nacionalisacion di e Colegio toets. Den pasado ta e propio scol tabata traha e toets y tabata responsabel pa e coreccion y determinacion di clausula cu ta wordo aplica pa genera e resultado. Ningun otro departamento no tabata envolvi cu e parti di desaroyo ni control, algo cu Minister Hooyboer-Winklaar no a considera como e forma mas ideal y transparente. Desde e aña aki a formalisa un decreto ministerial pa instala un comision bou di supervision di Examenbureau cu ta encarga cu e Colegio toets.

 

E comision cu a keda instala ta consisti di docentenan di ambos scol di Havo/Vwo cu ta responsabel pa e desaroyo di e toets, como tambe di otro docentenan cu tin como responsabilidad e control di calidad. Compara cu antes awo Examenbureau ta esun responsabel pa ricibi e toets di cada alumno asina cu esaki a tuma luga pa asina percura pa e analisis y pa genera e resultado. Pa e parti aki Examenbureau ta haya asistencia di Centraal Bureau Statistiek (CBS).

 

E tarea importante di ambos Examenbureau como di CBS ta pa haci un toetsanalyse pa determina e validez di cada parti di e toets. Examenbureau ta finalmente e instancia autorisa pa determina e clausula pa determina e cifra y tambe ta e instancia cu lo produci y comunica e resultadonan na Colegio Arubano y Colegio San Nicolas. Ambos scol na nan turno lo comunica e resultado di e alumnonan na cada scol basico.

 

Un otro aspecto importante cu a añadi na e proceso di admision y specificamente pa cu e toets ta e posibilidad pa un alumno haci e toets na un otro ocasion den caso di enfermedad. Asina cu e resultadonan di e toets ta conoci esaki hunto cu e conseho di e scol basico y cifranan di rapport di klas 5 y klas 6 di scol basico lo determina e admision di alumno na ciclo basico di HAVO/VWO.

 

Minister Michelle Hooyboer-Winklaar ta convenci cu e cambionan aki tabata necesario pa asina yega na un Sistema di admision mas husto y transparente. E titular di enseñansa ta indica cu e ta kere den un acercamento mas holistico di desaroyo di alumnonan y reconocemento di capacidad y potencial. Minister di Enseñansa ta desea tur e alumnonan cu a participa na e Colegio toets hopi exito. Hunto cu alumnonan y mayornan nos ta ansioso pa e resultado positivo di nos muchanan, e titular di enseñansa a conclui.

Top