Minister ing. Mike de Meza ta haya cu awor CITGO a firma acuerdonan pa start rehabilitacion; Na final di 2018 refineria lo cuminsa opera

Refineria di Aruba y CITGO tabatin un momento sumamente importante pa sigui cu e siguiente fase, na momento cu CITGO a firma cu e contratistanan, e compania mayor cu lo rehabilita refineria.

CITGO a firma e prome acuerdo di financiamento pe prome fase di rehabilitacion pe aña aki y otro aña y despues lo sigui pe di dos fase.

A firma e acuerdo aki p’asina por start cu operacion di e refineria na fin di 2018.

 

Minister di Turismo, Transporte, Energia y Medio Ambiente, ing. Mike de Meza a indica cu a firma un protocol di trabao y di migracion cu semper tabata firma cu otro companianan manera Lago, Coastal, Valero, etc. Tambe nan a firma un otro protocol di Aduana cu semper ta firma, pero na mes momento a optimalisa esaki mas efectivo y tambe a firma un otro acuerdo cu tabata entre CITGO  y e companianan di construccion, Technip y Y&V.

 

Esaki ta haci cu CITGO lo bay di e prome fase pa haci trabounan di preparacion y aworaki lo bay den e fase di ehecucion di e rehabilitacion.

Lo contrata hopi hende local pa traha den e refineria y gran parti di e companianan local lo haya trabou, Minister de Meza a expresa.

E fase cu ta bin ta cu CITGO mes hunto cu e consorcio lo reuni cu e companianan local pa delibera riba nan experticio, nan disciplina y pa cuminsa contrata trahadornan pa cuminsa traha riba e trabounan cu mester tuma lugar.

 

“Mi kier a sigura pueblo cu un tiki di pasenshi cu nos tabatin, awe nos a yega na un di e partinan mas importante den henter e trayecto aki”, Minister de Meza a comenta.

E “hoofd aannemer”, EPICI Franchise a firma cu CITGO pe financiamento di e prome fase, mientras cu e di dos fase ta cla, pero ta caba prome cu e prome fase.

N’e firmamento di e acuerdonan aki Presidente di CITGO y diferente Vice Presidente di CITGO tabata presente, pero tambe algun Minister a presencia e momento historico aki.

E dia aki tabata masha grandi y pueblo por ta sigur cu lo nota accion relativamente liher.

 

E proyecto di rehabilitacion a bay awor riba un otro nivel, lo ehecuta diferente trabou, manera cumpra materialnan, haci trabou di ingenieria, habri tur aparato, ta bay sigui inspeccionnan y lo bay cuminsa drecha.

Hopi actividad pa keur e refineria lo tuma lugar y si tur cos ta bon, pa mas o menos final di otro aña e prome parti di e refineria lo sende p’asina sigui cu e di dos fase.

Pa 2019 e refineria lo ta funcionando na 209 mil bari pa dia.

Top