Minister Juan David Yrausquin a felicita Milly Schwengle cu su funcion den Raad van State

DEN HAAG – Staatsraad na Raad van State pa Aruba, mr. Mildred (Milly) Schwengle a haci ayera diabierna 10 di november un bishita di cortesia na Minister Plenipotenciario demisionario Juan David Yrausquin.

Dia 1 di november ultimo sra. Schwengle a huramenta dilanti Rey Willem Alexander, mientras cu Conseho di Minister di Reino a dicidi 30 di juni pa nombra Milly Schwengle como Staatsraad na Raad van State.

 

Minister Juan David Yrausquin a cuminsa na felicita sra. Milly Schwengle cu su funcion nobo na Raad van State.

E mandatario a desea sra. Schwengle hopi sabiduria y a bisa di ta sigur cu Aruba den su persona tin un bon representacion den Raad van State.

 

Milly Schwengle a studia ley na Radboud Universiteit na Nijmegen. Di aña 1990 te 1992 sra. Schwengle a ocupa e funcion di Fiscal suplente na Ministerio Publico na Aruba.

Despues e tabata te 1994 Griffier na Corte den Prome Instancia na Aruba.

Na 1994 el a haci e traspaso pa abogacia y desde 1999 Milly Schwengle tabata managing partner na HBN Law Aruba.

(Potret ta cortesia di Cas di Aruba)

Leave a Reply

Top