Minister Michelle Hooyboer-Winklaar reflehando riba un dia sumamente exitoso di Dia Internacional di Hende Muhe

Reflehando riba e evento di Dia Internacional di Hende Muhe teni 8 di maart ultimo, na Renaissance Convention Center Minister di Educacion, sra. Michelle Hooyboer-Winklaar ta expresa di a keda sumamente contento cu e exito di e dia aki den tur sentido.

 

“Mi ta kere cu loke nos a trece den sala di Renaissance den presencia di 800 – mayoria muhe – tabata un mensahe di speransa. Apesar di diferente obstaculo cu hende muhe mester confronta den bida nan por sobresali. Nan por surpasa cualkier obstaculo, trauma y cosnan hopi negativo cu nos ta wak hopi biaha hende muhe sa pasa den dje,” e mandatario ta refleha.

Minister ta sigui bisa cu ora scucha for di nan den nan propio bos, esaki tabata mi experiencia… “y esunnan cu tabatin e curashi pa comparti nan storianan cu hopi biaha ta cosnan hopi tabu cu ningun hende kier papia di dje nan tabatin e curashi di para riba stage y duna nan mensahe di speransa.”

 

“Un mensahe di sin importa no haci loke kisas otro hendenan ta bisabo den bo bida e unico cos cu bo mester hinca den bo cabes ta cu por surpasa cu amor, stimacion y sosten di esunnan rond dibo. Esey tabata e mensahe principal. Mi ta kere di otro banda e mensahe cu a sali ta cu nos hende muhe ta sumamente fuerte. Loke ami a trece dilanti ta cu tin un diferencia entre tof y fuerte,” e mandatario ta amplia.

 

E ta sigui bisa cu esey tabata e enfasis. Ban pone e focus cu nos hende muhe ta fuerte sin mester ta tof… “esey ta loke a resona henter dia den e conferencia.”

Minister Hooyboer-Winklaar ta bisa di a keda sumamente contento cu e diferente oradornan cu tabata presente tanto internacional como local… “mi ta hayando asina hopi mensahe ainda cu a drenta di gradicimento di e caliber cu nan a trece. E hecho cu nan tabata asina habri y honesto. Mi ta kere simplemente henter un dia cu tabata yena cu  a inspiracion pa hopi di esunnan cu tabata presente.”

 

“Ami ta contento cu e tabata un exito. Nos por conta riba dje. Aruba tambe a participa internacionalmente pasobra cu nos a link cu organisacionnan internacional cu ta sigui diferente paisnan y Aruba sigur a desplega riba e tereno aki,” e mandatario ta remarca.

Un di e oradornan internacional na e dia exitoso aki tabata Prinses Laurentien van Oranje cu tambe a expresa su mes riba e dia tan special aki.

 

Prinses ta splica cu su speech a bay riba e topico di e rol di muhe pa duna nan yiunan e facultad pa nan rol  den sociedad como esunnan cu lo mester trece e cambionan positivo… “y ami ta kere hopi den esey. Tin dos miljard mama riba mundo y e pensamento ta cu muhenan kier e miho pa nan yiunan. Asina pa definicion realmente pensa riba termino largo y esey ta loke nos tin mester.”

 

E prinses ta sigui bisa cu esaki ta e di tres biaha cu e ta aki pa un conferencia. “Mi a bin antes pa dia Internacional di Hende Muhe y tambe mi a bin pa Dia Internacional di Mucha y cu tempo mi a cuminsa sinti mi mes hopi na cas aki na Aruba.”

 

“Mi a sinti cu tabatin un forsa real pa cambio den e ambiente. Ocho cien muhe cu ta enfoca pa cambio positivo compartiendo nan bida y manera mi a bisa mi ta kere firmemente pa combina generacionnan. Esey ta muhenan y mamanan specialmente muhenan en general. Rond di esey muhenan por hunga un rol bunita. Esey bo por a sinti den e aire.

Nos ta biba den un tempo di hopi insiguridad y poco claridad y ta e ora mester factornan stabilisante. Muhenan hunto cu hombernan pasobra ami ta kere cu mester combina pa e forsa positivo pa cambio y esey mi a sinti awe,” Prinses Laurentien ta expresa.

Top