Minister Mike de Meza a reuni cu Secretario di Estado, Sharon Dijksma riba asunto di Medio Ambiente y Aviacion Civil

Dialuna ultimo a yega Aruba pa algun reunion importante Secretario di Estado di Infrastructura, Transporte y Medio Ambiente di Hulanda sra. Sharon Dijksma.

Na su yegada e tabatin un encuentro cu Prome Minister Mike Eman y despues a sigui un reunion di trabou cu Minister encarga cu Transporte ing. Mike de Meza hunto cu su conseheronan.

Den e encuentro a elabora riba diferente tema, manera medio ambiente na Aruba, esta proyectonan cu Aruba ta trahando riba dje y e dump na Parkietenbos, pero tambe e situacion di InselAir Aruba.

 

Importante ta cu na final di e reunion a keda dicidi cu lo bay traha hunto riba nivel den temanan di Aviacion Civil y lo haya asistencia di Aviacion Civil di Hulanda, den preparacion di e trabounan cu mester wordo haci den cuadro di e audit cu ICAO lo haci otro aña di Aruba.

Minister Mike de Meza a splica cu el a sinti cu sra. Sharon Dijksma a mustra un berdadero interes den tur loke Aruba ta haciendo riba tereno di energia alternativa, e trabounan cu Aruba ta haciendo, pero tambe con por enfoca y promove autonan cu ta core riba electricidad riba e isla.

 

“Esaki t’e futuro y e direccion cu nos mester bay pa 2020 pa yega na 100% dependiente di energia alternativa. Transporte den e meta aki tambe ta hunga un rol importante,” e mandatario a bisa.

El a agrega cu Hulanda sigur kier traha cu Aruba den e plan total pa ta dependiente di solamente energia alternativa.

E Secretario di Estado a probecha pa bishita Parke Arikok y Spaans Lagoen, y a haya un splicacion di e 16 areanan cu ta bay wordo protegi dentro di poco, unda bes cu e ley keda cla.

Esaki, e mandatario a enfatisa, ta algo masha importante pa proteccion di ambiente.

 

“El a keda hopi contento di mira cu tin asina hopi trabou cu ta wordo haci riba e tereno aki. No tur cos ta sali den prensa local.

Nos Arubianonan a bira hopi mas consciente pa loke ta medio ambiente y pronto nos lo informa riba tur loke nos ta haciendo riba e tereno aki,” Minister Mike de Meza a duna di conoce.

 

 

Top