Minister mr. drs. Arthur Dowers a reuni cu Comandante nobo di Guardacosta di Corsou

WILLEMSTAD – Diaranzon merdia, Minister di Husticia di Aruba, mr. drs. Arthur Dowers, a realiza un bishita di trabou na Guardacosta, situa n’e base di marina militar Parera na Corsou.

Durante e bishita aki, Minister Dowers a dialoga cu e Director nobo di Guardacosta, Commandant der Zeemacht di Caribe, Peter Jan de Vin, como tambe cu e Director suplente Eugene Middelhof.

 

E dialogo entre nan tabata basa riba varios topico di interes general comun, manera e.o. e radar extra y nobo cu ta den proceso pa wordo adkeri y instala na Aruba.

Aki nos ta papia di un inversion di mas o menos 2 miyon florin, pa di e forma aki Guardacosta di Aruba hunto cu Cuerpo Policial, sigui brinda seguridad na nos fronteranan.

Tambe Minister Dowers a splica e Director nobo cu Aruba a institui un Departamento di Recherche nobo cu ta encarga cu mensenhandel/mensensmokkel cu ta cay directamente bou di e Departamento di Recherche encarga cu Crimen Organisa y cual lo yuda tambe na momento cu e botonan mester purba di drenta cu hendenan indocumenta na nos isla.

 

Pa loke ta trata e colaboracion estrecho cu Guardacosta Aruba y Cuerpo Policial tin cu otro, e mandatario a splica e Director J. de Vin, cu e lo desea p’e lasonan entre Guardacosta y Polis Maritimo di Aruba, por ta aun mas estrecho di loke cu e ta caba, dor di brinda dicho miembronan policial tambe e oportunidad di traha cu nan pa loke ta trata e radar cu Guardacosta tin na Aruba.

 

Banda di esaki, tambe nan a intercambia di informacion mas estrecho di ayudo cu mester y ta wordo brinda na hermana isla St. Maarten y tambe otro islanan den e becindario cu a sufri enormemente despues di e desaster natural.

Por ultimo a wordo indica, cu ta masha contento cu e base solido cu a wordo crea e ultimo 8 aña cu a trasncuri, cual ta dunando su frutonan positivo y cu e mesun plan di maneho aki lo continua mirando cu e ta basa riba un termino di duracion duradero y a largo plaso, caminda cu Guardacosta y Polis Maritimo di Aruba lo continua ricibi mas material pa continua combati criminalidad na nos fronteranan manera a wordo acorda durante e periodo di 8 aña.

 

Un di e ultimo detaye cu Minister Dowers a splica ambos dirigentenan di Guardacosta di Caribe Hulandes, ta su persona a laga institui un asina yama Fusion Center. E asina yama Fusion Ceter aki, ta cay directamente bou di supervision di Procurador General. Por bisa cu e lo e punto central di informacion y investigacion.

E idea ta pa tur departamento gubernamental y no unicamente esnan hudicial, lo bay traha hunto cu otro y lo mester suministra tur informacion n’e departamento aki, pa di un forma mas structura combati crimen organisa.

 

Pues no ta un secreto, cu e mundo di crimen organisa continuamente ta keda busca manera di burla di autoritad. Como tal, e linea di pensamento semper lo keda, cu mester keda modernisa e forma di proceder pa gara e delincuentenan cu mucho mas facilidad, pero kedando semper den margen di leynan vigente.

 

 

Leave a Reply

Top