Minister Paul Croes: Campaña #STOPAWO ta continua

Abuso di mucha ta un di e tematicanan mas preocupante den nos comunidad. Sea ta trata di abuso fisico, emocional, verbal of sexual, mester pone un stop na dj’e mas lihe cu ta posibel, mirando e daño cu cualkier forma di abuso ta laga atras.

 

Pa conscientisa pueblo di Aruba di e tema aki, Minister Paul Croes a inicia na aña 2014 un campaña di conscientisacion y prevencion yama #STOPAWO. Un campaña cu a ricibi atencion masal for di pueblo y cu recepcion total.

Pueblo di Aruba henter por mira atras y corda riba e campaña aki, na unda un y tur por a mustra nan apoyo y sosten pa cu e campaña #STOPAWO, wantando e famoso borchi di e campaña, tumando un foto cu esaki y compartie den medianan social.

E campaña a resulta den un exito total mirando e conscientisacion cu el a trece cu ne den henter nos comunidad.

 

Pa es rason, Minister Croes a escohe pa un biaha mas continua cu e campaña aki, pero awor den su forma original. Despues cu na aña 2015 y 2016 a scoge pa tene e campaña den un forma mas administrativo, awor un biaha mas ta e momento pa pueblo mustra nan desaprobacion pa cualkier forma di abuso di mucha.

E campaña #STOPAWO pronto lo reactiva y Minister Croes ta conta cu apoyo y sosten di pueblo henter pa den un forma preventivo, un biaha mas conscientisa nos comunidad di e problematica aki, y hunto pone un STOP na tur forma di abuso di mucha.

Top