Minister Paul Croes ta felicita DPL cu nan prome lustro

Dia prome di augustus, Departamento di Progreso Laboral (DPL) a cumpli 5 aña di existencia y ta den pleno celebracion.

Na aña 2011 a bin cu e iniciativa pa introduci e departamento nobo aki en conexion cu cambionan cu a keda haci p’asina por ta mas eficiente y por duna un miho servicio na publico den e area social.

Despues di e introduccion aki, awendia nos ta conta cu un departamento di labor cu ta atende mas cu e aspecto huridico y nos ta conta cu departamento di progreso laboral cu ta atende cu e parti di servicio na comunidad.

DPL a trece cu ne e tempo ey un imagen completamente nobo, empleadonan nobo, logo nobo en corto bisa un bachi completamente nobo p’asina por bin cu mas inovacion tambe den e servicio cu ta keda duna y cual ta netamente loke e departamento a bin ta haci tambe durante e ultimo 5 añanan aki.

Segun sr. Richinel Stamper di DPL, “en berdad den transcurso di e añanan a pasa den diferente situacion crucial cu di un of otro forma a afecta e mercado laboral, pero di otro banda a pasa den varios situacion positivo tambe cu a y lo influencia e mercado laboral positivamente y cu ta aspectonan cu ta influencia e servicio cu e departemento aki ta duna.”

DPL ta concentra nan mes riba personanan local y ta brinda tur servicio necesario pa fungi como un puente pa facilita dunadornan di trabou y personanan en busca di trabou pa yega na otro. Bisando esaki, e meta principal di DPL ta pa yuda un persona yega mas cerca posibel na un trabou.

Un di e proyectonan grandi cu Minister di Asuntonan Social ta pone enfasis riba dj’e y cual ta keda ehecuta pa DPL ta e conocido proyecto “Ban Traha” cu ta purba di reintegra mas hopi persona posibel riba bijstand bek rib’e mercado laboral, p’asina baha gasto di Gobierno, pero tambe trece un mercado laboral hopi mas eficiente basa rib’e pensamento cu cada persona cu ta traha ta yuda comunidad y su mes.

Un proyecto cu ta dunando sumamente bon resultado cu un cantidad grandi di persona ya caba un biaha mas den e mercado laboral.

Minister Paul Croes ta felicita DPL cu nan prome lustro y e bon trabou y servicio cu e departamento aki, specialmente como un departamento nobo ta brinda na nos comunidad.

Top