Minister Paul Croes ta felicita FEDAA cu apertura di nan oficina

Durante un atardi sumamente ameno Minister drs. Paul Croes y sra. Stella Monsanto a haci apertura oficial di oficina di FEDAA den MFA Paradera.

Fundacion p’esnan cu Deficiencia Auditivo Aruba (FEDAA) a keda funda 11 di april 2013 y despues di haci tur lo posibel y cu ayudo di Ministerio di Asunto Social y Ministerio di Asunto General, a logra habri nan oficina na MFA Paradera p’asina por duna guia, conseho y informacion na pueblo y specialmente esnan cu deficiencia auditivo.

 

Cu e oficina aki FEDAA kier señala, wak y traha riba e problemanan relaciona cu perdida di oido, problemanan cu comunicacion, laboral, enseañsa y economico cu e grupo di persona aki ta keda confronta cune.

Cu e paso grandi aki, awor lo haci tur lo posibel p’e persona alcansa un posicion igual den nos comunidad p’asina e persona por keda inclui den nos sociedad sin ningun clase di discriminacion.

 

FEDAA ta boga pa un y tur ricibi e mihor guia cu ta posibel pa por funciona optimalmente den nos comunidad cual ta nan derecho.

P’e rason FEDAA ta keda considera como e brug pa facilita e integracion pa personanan cu problema auditivo den nos comunidad, nan derechonan wordo balora y respeta.

Minister Paul Croes a felicita e fundacion aki cu e gran logro mirando cu e meta di FEDAA ta encaha perfecto cu e vision di Minister Paul Croes pa inclui personanan cu cualkier tipo di limitacion mas den nos comunidad y asina eleva calidad di bida di tur ciudadano riba nos pais.

Top