Minister President bishitado Pier y scuchando e Piscadonan nan inkietud

 

Riba diadomingo mainta trempan a wordo planea di parti Departamento di Agricultura, Cria y Pesca Santa Rosa un bishita na diferente Pier di Piscado cu resorta bou di Santa Rosa. Nos seccion di Pesca cu ta Fundacion Centro di Pesca Hadicurari ta mantene e Piernan aki cu ta di Gobierno.

Hunto cu Minister Presidente sr. Mike Eman, director di Santa Rosa sr. Nathalie Maduro, sr. Byron Boekhoudt cu ta chef di seccion di pesca y algun miembro di bestuur a bishita e Piernan aki.

 

A cuminsa parti pariba di Aruba cu ta e Pier di Rogers Beach. Aki Minister President sr. Mike Eman hunto cu esnan encarga  a yega pa asina tuma nota di e dañonan causa pa Horca Mathew algun luna atras.

Scuchando e inkietudnan cu e Piscadonan tabata tin na e momento ey cu tambe tabata warda riba Minister Presidente su yegada. E vocero sr. Ernulfo Beaumont a combersa cu Minister Presidente sr. Mike Eman den nomber di demas piscadonan.

Diferente inkietud a wordo treci dilanti y tambe diferente otro ideanan a bin dilanti pa un mihor contribucion di parti esnan encarga cu e Piernan y engrandece pesca engeneral aki na Aruba.

 

Despues di a bishita e Pier di Rogers Beach a sigui pa esun di di Cura Cabay. Piscadonan for di trempan wardando e Minister Presidente sr. Mike Eman pa asina tuma nota tambe kico tur nan tin pa trece dilanti hunto cu esnan di Santa Rosa, seccion di Pesca y miembronan di bestuur di Centro di Pesca Hadicurari.

Vocero di e Piscadonan di Cura Cabay sr. Ruben Willems a combersa cu Minister Presidente sr. Mike Eman, kende a pone tur puntonan di inkietud riba papel y hasi entrega di esaki p’asina nan por haya oido di parti e mandatario.

Un di e puntonan aki ta falta di luz cu nan tin na e Pier aki. Por a tuma nota tambe di mayoria trabounan cu ta andando pa e parti di construction cu partinan nobo cu pronto lo keda finalisa.

 

Pier di Spaans Lagoen, Centro di Pesca Spaans Lagoen ta otro di e facilidadnan cu a keda bishita. Sr. Alex Farro vocero di e Piscadonan tabata presente p’asina duna di conoce na Minister Presidente sr. Mike Eman kico ta e ayudo cu nan mester na e pier aki cu no mucho tempo pasa a wordo renoba.

Tin un parti cu no ta cai bou di Gobierno di Aruba na e pier aki cu mester di mantencion riba corto plaso pa motibo cu un parti di e Pier a cuminsa kibra.

 

Pier di Waf’i Rancho na Waf Chikito tambe a wordo bishita Round. Na e Pier aki kisas kehonan no ta mucho pa motibo cu e Pier aki apenas tin un aña of kisas un poco mas cu ela wordo ronoba. Sr. Clifford Rosa kende ta presidente di Fundacion Centro di Pesca Hadicurari a haci acto di presencia p’asina intercambia di idenan pa un miho funcionamento di e facilidad.

E recorido a continua pa e Pier di Fundacion Centro Di Pesca Hadicurari. Sr. Byron Boekhoudt Chef di e seccion di Pesca brevemente a duna Minister Presidente sr. Mike Eman un splicacion di funcionamento di e Pier. Dañonan hasi pa Horcan Mathew cu ya a wordo repara y manehonan pa uzo di e Pier ta algun di e splicacionan cu a wordo duna.

 

Pa finalisa e recorido miembronan di e directiva di Fundacion Centro di Pesca Hadicurari a reuni cu Minister Presidente sr. Mike Eman evualua e peticionnan cu tabata tin durante e recorido y con esakinan mester bai wordo realisa.

Di parti di Departamento di Agricultura, Cria y Pesca Santa Rosa nos ta sumamente content di por a realisa un recorido hunto cu Minister Presidente sr. Mike Eman pa asina mira kico ta “come y bebe” di e facilidadnan aki y duna atencion na nos Piscadonan.

Top